Іshki ister organdarynyń 30 qyzmetkerine memlekettik nagradalar tapsyryldy
ASTANA. QazAqparat - Búgin Otan qorǵaýshylar jáne Jeńis kúni merekesin atap ótý aıasynda «Alataý» sport kesheniniń aldyndaǵy qyzmettik boryshyn óteý kezinde qaza bolǵan ishki ister organdary qyzmetkerleri men ishki áskerlerdiń áskerı qyzmetshilerine arnalǵan monýmentke gúl shoqtaryn qoıý rásimi ótti. Bul jaıynda QR Іshki ister mınıstrliginen málim etti, dep habarlaıdy QazAqparat.
«Monýmentke gúl shoqtaryn qoıý rásimine mınıstrliktiń jáne ortalyq apparat qyzmetteriniń basshylary, ardagerler, ishki ister organdary men ishki áskerler ardagerleri, shaqyrylǵan qonaqtar qatysty. Gúl shoqtaryn qoıý rásimi aıaqtalǵannan keıin sharaǵa qatysýshylar qyzmettik boryshyn óteý kezinde qaza bolǵan ishki ister organdary men ishki áskerler áskerı qyzmetshileriniń rýhyna arnap bir mınýttyq únsizdik jarııalady», - delingen aqparatta.
Vedomstvo aqparatyna qaraǵanda, Іshki ister mınıstrliginiń klýbynda saltanatty jınalys ótip, onda mınıstr Qalmuhambet Qasymov ishki ister organdary qyzmetkerlerin kásibı merekesimen quttyqtap, qyzmetterine tabys tiledi.
«Іshki ister organdarynyń 30 qyzmetkerine memlekettik nagradalar tabys etildi. Mınıstrdiń merekelik buıryǵymen ishki ister organdarynyń birqatar qyzmetkerleri «Quqyq tártibin qamtamasyz etýge qosqan úlesi úshin» medalimen jáne «ІІO úzdigi» tós belgisimen, qurmet gramotalarymen marapattaldy», - dep atap ótken mınıstrlikten.
Sonymen qatar Іshki ister mınıstriniń buıryǵymen qyzmettik mindetterin adal oryndaǵany úshin ortalyq apparattyń jáne aýmaqtyq bólinisterdiń 637 qyzmetkeri marapatqa ıe bolǵan.
