Іshki ister organdaryndaǵy esepke alý-tirkeý tártibin jetildirý máseleleri talqylandy
ASTANA. 4 shilde. QazAqparat - /Marlan Jıembaı/ - Búgin Qaýipsizdik Keńesiniń hatshysy M.Tájınniń qatysýymen Bas prokýratýra men Іshki ister mınıstrliginiń birlesken alqa májilisi ótip, onda ishki ister organdaryndaǵy esepke alý-tirkeý tártibi jáne quqyq qorǵaý qyzmetindegi baǵa berý ólshemin jetildirý máseleleri talqylandy, dep habarlady QR Bas prokýratýrasynyń baspasóz qyzmeti.
Alqa jumysyna Bas prokýratýra jáne ІІM basshylary men alqa músheleri, oblys prokýrorlary men ishki ister departamentteriniń bastyqtary qatysty, sondaı-aq beınebaılanys arqyly oblystyq, qalalyq jáne aýdandyq býyndardaǵy prokýrorlar men ishki ister bólimderiniń qyzmetkerleri qatystyryldy.
Quqyq qorǵaý organdary jumysynyń tıimdiligine qoıylyp otyrǵan jańa talaptar aıasynda, Memleket basshysynyń quqyq qorǵaý qyzmetiniń baǵa berý ólshemderin jetildirý, qylmysty jasyrǵany úshin derbes jaýapkershilikti kúsheıtý jónindegi tapsyrmalaryna sáıkes Bas prokýratýra Іshki ister mınıstrligimen birlesip qylmystar men oqıǵalar týraly aryz-shaǵymdardy tirkeý, esepke alý jáne qaraýdaǵy zańdylyqtyń jaı-kúıine taldaý jasady. Jınalysta esepke alý, tirkeý tájirıbesin jetildirý jáne oǵan sapaly túrde jańa kózqaras engizý, qylmystardy jasyrý derekterin boldyrmaý joldary talqylandy. Májiliske qatysýshylar atap ótkendeı, máseleniń mańyzdylyǵy men ótkirligine degen jalpy túsinistik qoıylyp otyrǵan mindetterdi birlesip sheshýge múmkindik berýi tıis.
Qabyldanyp otyrǵan sharalarǵa qaramastan, ishki ister organdaryndaǵy esepke alý-tirkeý tártibi asa ótkir másele kúıinde qalyp otyr. Sońǵy bir jarym jyl ishinde ǵana 11 myńnan astam jasyrylǵan qylmys anyqtaldy. Quqyq qorǵaý qyzmetiniń nátıjeliligin baǵalaýdyń eskirgen ólshemderi, sonyń ishinde qylmystardyń ashylý paıyzy, sonymen qatar aryzdardy qabyldaý men qaraýdyń kópsatyly nysandarynyń bolýy osyndaı jaǵdaıdyń negizgi sebepteri bolyp otyr. Qylmystyq isti qozǵaýdan bas tartý jáne aryzdy esepke alýdan jasyryp qalý tárizdi qylmystardy jasyrý ádisteri neǵurlym keńinen taralǵan.
Qalyptasqan jaǵdaı túbegeıli ózgeristerge alyp keletin jańa sheshimder men júıeli sharalar qabyldaýdy qajet etedi. Osyǵan baılanysty, quqyq qorǵaý qyzmetin baǵalaý ólshemderin ózgertý, sonymen qatar qylmystar týraly aryzdar men habarlardy tirkeýdiń túbegeıli jańa mehanızmderin engizý qajet dep sheshildi. Tirkeý qyzmetteriniń jedel-izdestirý bólimsheleri men jergilikti ishki ister organdary basshylarynyń áserinen tys bolýy qylmystardyń neǵurlym tolyq tirkelýine septigin tıgizedi.
Bas prokýratýra qylmystar men oqıǵalar týraly aryz-shaǵymdardy tirkeý jáne qaraý protsesine ınnovatsııalyq tehnologııalardy engizý jumystaryn júzege asyrýda, osynyń nátıjesinde árbir aryz ben habarlamanyń qaralý barysyn shynaıy ýaqyt rejıminde monıtorıng jasap otyrýǵa múmkindik ashyldy. Sonymen qatar, jaqyn arada habarlama-talon berý jobasy júzege asyrylmaq. Ol boıynsha aryz berýshi Internet, SMS-habarlama jáne call-ortalyq arqyly quqyq qorǵaý organdarynyń aryzyn tirkegenine kóz jetkizip, sondaı-aq olardy qaraý barysyn bilip, ol jóninde qabyldanǵan is júrgizýshilik sheshimmen de tanysa alady.
Májilistegi talqylaý qorytyndysy boıynsha qylmystyq qýdalaý organdarynyń basshylaryna qylmystardy esepke alýdan jasyrǵany úshin jaýapkershilikti qatańdatý, esepke alý-tirkeý tájirıbesiniń jaı-kúıine qatań vedomstvolyq baqylaý ornatý qajettiligi atap kórsetildi.
Barlyq deńgeıdegi prokýratýra jáne ishki ister organdarynyń basshylaryna qylmystar men oqıǵalar týraly aryzdardy elektrondyq tirkeýdiń, sondaı-aq ІІM jedel basqarý ortalyǵynyń aqparattyq bazasynyń múmkindikterin tıimdi qoldanýdy qamtamasyz etý usynyldy. Qylmystyń jetkilikti belgileri bolǵan jaǵdaıda qylmystyq is qozǵaý jáne qaıtalanatyn tergeýge deıingi tekserýsiz tergeý amaldaryn júrgizý týraly dereý sheshim qabyldaý qajet.
Quqyqtyq statıstıka jáne arnaıy esepke alý komıtetine tirkelgen qylmystar men ákimshilik quqyq buzýshylyqtar týraly biryńǵaı esep jobasyn jasaý tapsyryldy.
Prokýrorlardyń aldyna tómengi turǵan prokýrorlardyń jumys tıimdiligin baǵalaý ólshemderin qaıta qaraý, jergilikti jerlerdegi esepke alý-tirkeý tártibine tıisti qadaǵalaýdy qamtamasyz etý, jasyrylǵan qylmys týraly anyqtalǵan árbir derek boıynsha kináli laýazym ıelerin jaýapkershilikke tartý jóninde mindetter qoıyldy.
