Іshki ister organdaryna qatysty 40 memlekettik qyzmettiń 38-i avtomattandyryldy
«Eń aldymen biz memlekettik qyzmetti alý kezinde azamattardyń polıtsııamen tikeleı baılanysyn alyp tastadyq. Endi olar memlekettik organdardyń jumys rejımine táýeldi bolmaı, qyzmetti kez kelgen yńǵaıly ýaqytta ala alady. Biz 40 memlekettik qyzmettiń 38-in avtomattandyrdyq. Bul óz kezeginde Іshki ister mınıstrliginiń qyzmetin alýan túrli jolmen alýǵa múmkindik berdi. Meniń baıqaǵanym, azamattarymyz qyzmetti kóbinese onlaın túrde alǵandy jón kóredi. Mysaly, bıyl qazaqstandyqtar ishki ister organdaryna qatysty 500 myńnan astam qyzmetti HQO arqyly alsa, Egov portaly arqyly 800 myńnan astam qyzmet kórsetilgen», - dedi Sáken Sársenov OKQ-de ótken baspasóz máslıhatynda.
Sondaı-aq, mınıstrdiń orynbasary bıyl 20 qyrkúıekten bastap elimizdiń barlyq HQO-synda qujat nemese anyqtama alý QR-kod arqyly qoljetimdi ekenin eske saldy.
«Osylaısha Іshki ister mınıstrliginiń kóptegen qyzmetterin elektrondy formatqa kóshirdik. Atap aıtqanda, quqyq buzý faktiler boıynsha tsıfrlyq derekter bazasyn qurdyq, aıyppul týraly elektrondy habarlama júıesin iske qostyq, sonymen qatar keıbir qyzmetterdi basqa memlekettik organdardyń júıesimen biriktirdik. Aqparattyq júıelerdi biriktirýdiń arqasynda memlekettik organdar kóptegen qujattardy bazadan tikeleı ala alady. Bul - atqarylǵan jumystyń bir bólshegi ǵana», - deıdi ol.
Buǵan deıin Sáken Sársenov jyl sońyna deıin shetel azamattary Qazaqstanda ýaqytsha turýǵa ruqsat alý jáne vıza ázirleýdi elimizdiń kez kelgen halyqqa qyzmet kórsetý ortalyǵynan alýǵa bolatynyn aıtqan edi.
