Іshki ister organdary jyl basynan beri 740-qa tarta quqyq buzýshylyqtar týraly aryzdar qarady
ASTANA. QazAqparat - Іshki ister organdary jyl basynan 740-qa tarta quqyq buzýshylyqtar týraly aryzdar qarady. Bul týraly búgin Májiliste ótip jatqan Úkimet saǵatynda Іshki ister mınıstri Qalmuhanbet Qasymov málim etti.
«Aǵymdaǵy jyl basynan beri ishki ister organdary tarapynan 740-qa tarta quqyq buzýshylyq týraly aryzdar men shaǵymdar qarady. Onyń ishinde 136 myńǵa jýyǵy - sotqa deıingi tergeýdi qamtyǵan qylmystyq quqyq buzýshylyqtar. Eki jyl qatarynan eldiń búkil quqyq qorǵaý júıesi qylmystyq sot óndirisiniń jańa úlgisi boıynsha jumys istep keledi. Jańa qylmystyq-protsessýaldyq kodeske sáıkes, bizde tergeýge deıingi tekserýler joq. Eger buǵan deıin qylmys resmı túrde tergeýge deıingi tekseriste jáne qylmystyq is qozǵalǵannan keıin ǵana tirkelse, qazir aryzdar men shaǵymdar sotqa deıingi tergeýdiń biregeı tizimine qylmys retinde birden tirkeledi. Al tirkeýdiń ózi sotqa deıingi tergeýdiń bastalǵanyn bildiredi», - dep túsindirdi mınıstr.
Onyń aıtýynsha, zańnamadaǵy bul jańa norma kóptegen qyzmetter jumysynyń aýqymyn arttyryp, ásirese tergeý qyzmetterinde qaýyrt jumystar kóbeıgen. Osyǵan baılanysty shtattyq jáne materıaldyq-tehnıkalyq nyǵaıtý sharalary qolǵa alynǵan.
«Byltyrǵy jyldyń qorytyndylaryna kelsek, qylmystyq ister boıynsha bir tergeýshige túsetin aýyrtpashylyq 136 qylmystyq iske jetti, al negizgi norma boıynsha bul 41 qylmystyq isten aspaýy kerek edi. Sondyqtan da, bizdiń tergeý qyzmetiniń jumysynda úlken qıynshylyqtar oryn alyp otyr. Olarǵa áli de shtattyq jáne materıaldyq-tehnıkalyq qamtaamsyz etý sharalaryn nyǵaıtý kerek», - dedi Q. Qasymov.
