Іshki ister organdary qyzmetkerleriniń páteraqylary óteletin bolady
ASTANA. 22 qańtar. QazAqparat - Іshki ister organdary qyzmetkerleri birqatar áleýmettik kepildikterge ıe bolady. Bul týraly búgin Májilistiń jalpy otyrysynda jańa redaktsııadaǵy «Іshki ister organdary týraly» zań jobasyn ekinshi oqylymda talqylaý barysynda málim boldy.
Qujat boıynsha baıandaǵan Májilis depýtaty Nurlan Ábdirovtiń aıtýynsha, ishki ister organdary qyzmetkerleriniń áleýmettik qorǵalýy qoǵam arasynda keńinen talqylanyp, qyzý pikirtalastar týdyrǵan bolatyn. Sonymen qatar, ishki ister organdarynyń qymetkerlerin áleýmettik qamtamasyz etý máselesin Májilis depýtattary da kótergen edi. Osyǵan oraı, atalmysh máseleler jańa redaktsııadaǵy zań jobasynda arnaıy 6-shy taraýmen bekitilip otyr. Úkimet depýtattardyń bul usynysyna qoldaý bildirgen. «Jańa zań jobasymen ishki ister organdarynyń qyzmetkerleri birqatar áleýmettik kepildiktermen qamtamasyz etiletin bolady. Atap aıtqanda, ishki ister organdarynyń jekelegen qyzmetteriniń krımınaldyq polıtsııa, tergeý, anyqtaý, jedel-krımınalıstik qyzmetter, uıymdasqan qylmysqa, terrorızmge jáne esirtki bıznesine qarsy kúres bólimsheleriniń qyzmetkerlerine turǵyn úı jaldaýyna nysanaly aqshalaı ótemaqy tóleý belgilenip otyr. Sonymen qatar, ishki ister organdarynyń qyzmetkerlerine jumys babymen oryn aýystyrǵan kezde, qyzmetker óziniń eki aılyq jalaqysy jáne ózimen birge kóshken otbasynyń árbir múshesine jarty aılyq aqshalaı jalaqysy mólsherinde kóterme járdemaqy tólenetin bolady. Áýe kóliginen basqa, kóliktermen júrý, múlikti tasymaldaý shyǵyndaryn óteý qarastyrylǵan. Bul bizdiń áriptesterimizdiń atqarǵan jumysynyń zor jemisi», - dedi N. Ábdirov.
