Іshki ister mınıstrliginiń ardagerleri men úzdik qyzmetkerleri marapattaldy

ASTANA. QazAqparat – Otan qorǵaýshylar kúnine jáne Uly Jeńistiń 78 jyldyǵyna oraı, ІІM-de minsiz qyzmetimen, janqııarlyǵymen jáne erligimen kózge túsken polıtsııa qyzmetkerleri, sondaı-aq Ulttyq ulannyń áskerı qyzmetshileri marapattaldy, dep habarlaıdy QazAqparat Polisia.kz caıtyna silteme jasap.

Ardagerler men vedomstvo qyzmetkerleri soǵys batyrlarynyń, erlikpen qaza tapqan tártip saqshylarynyń qurmetine ornatylǵan estelik taqtasyna gúl shoqtaryn qoıyp, olardy bir mınýt únsizdikpen eske aldy.

Shara quttyqtaý ári marapattaý rásimine ulasty. Vedomstvo basshysy Marat Ahmetjanov jınalǵan qonaqtarǵa izgi tilegin bildirip, minsiz qyzmeti úshin qyzmetkerlerge alǵys aıtty.

«Atalar amanat etken jerimiz ben halqymyzdy qorǵaý – bizdiń basty paryzymyz. Búginde osy amanatty arqalaǵan ishki ister organdarynyń qyzmetkerleri antqa adal bolyp, aıanbaı eńbek etip keledi. Sizderdiń eńbekterińizge Memleket basshysy joǵary baǵa berdi. Búgingi marapattardy halyqtyń bergen baǵasy dep bilińizder. Aldaǵy ýaqytta da sizderdi el senimin aqtaıdy degen úmittemin! Jurtymyz tynysh, týǵan jerimiz aman bolsyn!» - dedi mınıstr.

Aıtýly kúnde ishki ister mınıstrliginiń eńbek sińirgen qyzmetkeri, áıgili jedel ýákil Ǵabdirahym Meńdeshev І dárejeli «Aıbyn» ordenimen marapattaldy. Onyń ómiri fılmder men telehıkaıalardyń sıýjetine negiz bolatyn shytyrman oqıǵalarǵa toly. Ardager 80-90-shy jyldardaǵy eń aýyr qylmystardy ashýǵa qatysqan.

«Bul – meniń marapatym ǵana emes, áriptesterimniń de marapaty. Men óz ómirimdi zulymdyqpen kúresýge arnadym jáne sizder – jas qyzmetkerler de osy baǵytta úlken jetistikterge jetesizder degen senimdemin», - dedi Ǵabdirahym Meńdeshev.

Beıbit kúnde halyqtyń qamy úshin óz ómirlerin qaterge tigip, qaza tapqan qyzmetkerler de jeterlik. Solardyń biri – 40 jyl buryn dúnıeden ótken mılıtsııa leıtenanty Qalqaman Sembaev. Ol Tselınograd oblysy ІІB Atbasar aýdanynyń ishki ister bóliminiń ýchaskelik mılıtsııa ınspektory bolyp jumys istedi. Ofıtser 1982 jyldyń 22 qyrkúıeginde áıeldi balasymen qarýly kúıeýinen qutqaramyn dep qaza tapty. Qyzmet babynda kóz jumǵan ofıtserdiń áreketi joǵary baǵalanyp, «Erligi úshin» medali onyń jubaıy Ekaterına Sembaevaǵa tabystaldy.

«Búgin bizdiń otbasymyz úshin sondaı qýanyshty kún. Men Prezıdentimiz Qasym-Jomart Toqaevqa jáne ishki ister mınıstri Marat Ahmetjanovqa alǵysymdy bildiremin», - dedi qobaljýyn jasyra almaǵan áıel.

Aıta ketý kerek, marqum ofıtserdiń qyzy Armangúl Sembaeva búginde áke jolyn jalǵastyryp, polıtsııada qyzmet etedi.

Shara barysynda birneshe jyl ishinde úsh ret erlik jasap, toǵyz adamnyń ómirin saqtap qalǵan Medet Asqarov ta marapattaldy. Qaraǵandy oblysy PD Buqar jyraý aýdany polıtsııa basqarmasynyń ýchaskelik polıtsııa ınspektoryna ІІ dárejeli «Aıbyn» ordeni tabystaldy. 36 jastaǵy tártip saqshysy buǵan deıin tútin tolǵan páterden bes balany shyǵaryp, Nura ózenine batyp bara jatqan eki aýyl turǵynyn qutqaryp, apatqa ushyraǵan jolaýshy men júrgizýshige kómektesken.