Іshki ister mınıstrligine qarasty eki JOO basshysy jaýapqa tartyldy

NUR-SULTAN. QazAqparat – ІІM joǵary oqý oryndarynyń qyzmetinde oqý jáne oqý-ádistemelik jumysty uıymdastyrýda óreskel zań buzýshylyqtar men kemshilikter anyqtaldy, dep habarlaıdy QazAqparat Polisia.kz saıtyna silteme jasap.

Atap aıtqanda, Іshki ister mınıstrliginiń Qostanaı akademııasy men Aqtóbe zań ınstıtýtynyń basshylyǵy sapaly, tıimdi oqý jáne oqý-ádistemelik jumysty qamtamasyz etpegen. Tekserý nátıjesi memlekettik jalpyǵa mindetti standarttardyń saqtalýy boıynsha tıisti baqylaý júzege asyrylmaǵanyn kórsetti. Sonymen qatar, oqý-ádistemelik protsesti uıymdastyrý, oqý oryndary bólimsheleriniń jumysyn úılestirý tıisti deńgeıde qalyptaspaǵan.

Qostanaı akademııasy jáne Aqtóbe zań ınstıtýtynyń basshylyǵy jumystaǵy olqylyqtary men kemshilikteri úshin Іshki ister mınıstri M. Ahmetjanovtyń buıryǵymen jaýapqa tartyldy. Qazaqstan Respýblıkasy ІІM Sh. Qabylbaev atyndaǵy Qostanaı akademııasy bastyǵynyń orynbasary Aqan Nuryshevtiń qyzmetke tolyq sáıkes emestigi eskertildi. Qazaqstan Respýblıkasy ІІM M. Bókenbaev atyndaǵy Aqtóbe zań ınstıtýtynyń bastyǵy Altaı Baısultanovqa qatań sógis jarııalandy.

Foto: polisia.kz