Іshki ister mınıstrligi jazaǵa tartylýy tıis jasóspirimderdiń jasyn kóterýdi usynyp otyr
ASTANA. Naýryzdyń 18-i. QazAqparat /Aıdar Ospanalıev/ - Urlyq jasap, adam tonaǵan jáne aqsha bopsalaǵan jasóspirimderge degen qylmystyq jaýapkershilikti izgilendirip, atalmysh qylmystar úshin jazaǵa tartylatyndardyń jasyn 14-ten 16-ǵa deıin kóterý kerek.
Bul týraly búgin Parlament Májilisinde «Kámeletke tolmaǵandardyń quqyqtaryn qorǵaý salasyndaǵy zańnamalardy jetildirý» atty taqyrypta ótken dóńgelek ústel barysynda Іshki ister vıtse-mınıstri Aleksandr Kýlınıch málim etti, dep habarlaıdy QazAqparat.
Onyń sózine qaraǵanda, atalǵandar kámeletke tolmaǵandar arasyndaǵy eń kóp taraǵan qylmys túrleri. Osy áreketter boıynsha elde jylyna 3 myńǵa jýyq adam qylmystyq jaýapqa tartylady. Qoldanystaǵy zańdar boıynsha atalmysh qylmystar boıynsha jaýapkershilik 14 jastan bastap qarastyrylǵan. «Kámeletke tolmaǵandardyń arasyndaǵy jaǵdaıǵa baılanysty júrgizilgen zertteýler 14-15 jas aralyǵyndaǵy jasóspirimder tarapynan jasalatyn qylmystardyń jyldan jylǵa kemip bara jatqandyǵyn kórsetip otyr. Naqtyraq aıtqanda 2009 jyly 14-15 jas aralyǵyndaǵylar tarapynan 779 qylmys jasalsa, 16 -17 jastaǵylar 2 myńnan astam qylmys jasaǵan», dedi vıtse-mınıstr.
Onyń sózine qaraǵanda, qylmystyq jaýapqa tartý sharalaryn izgilendirý balalardyń quqyqtary men múddelerin qorǵaýǵa baǵyttalǵan ıgi qadam bolmaq. «Ekinshiden biz jasóspirimdi aýyr qylmys jasaǵan kezdiń ózinde jaýapkershilikten qutqara alamyz. Árıne eger eki jaq bir-birimen kelisip, keltirilgen zııan ótelip jatsa. Ol úshin qylmystyq kodekstiń 66-shy babyna jasóspirimder tarapynan jasalǵan qylmys boıynsha, eger adam ólip nemese adamǵa aýyr dene jaraqaty salynbasa qylmystyq jaýapkershilikten bosatý jónindegi tolyqtyrýlar engizý qajet», dedi A.Kýlınıch.
Ol keltirgen málimetteri boıynsha, sot - tergeý tájirıbesine júrgizilgen arnaıy taldaý jumystary alǵash ret aýyr qylmys jasaǵan jasóspirimniń bas bostandyǵynan aıyrylatyndyǵyn kórsetti. «Mysaly óte iri kólemde bireýdiń múlkin urlaǵan nemese bireýdi tonaǵan jasóspirim 3 jyldan 12 jylǵa deıin bas bostandyǵynan aıyrylýy múmkin. Al bizdiń zańǵa engizgeli otyrǵan ózgeristerimiz boıynsha aýyr qylmys jasaǵan jasóspirimniń bas bostandyǵynan aıyrmaı-aq tártipke salýǵa bolady. Al túrmege túsken jasósprim ondaǵy zııandy qasıetterdiń barlyǵyn boıyna sińirip, jas balanyń quqyqtyq sana sezimi ózgeredi. Budan keıin ol jasóspirimdi qaıta tártipke salý múmkin emes», dedi mınıstrdiń orynbasary.
