Іshki ister mınıstrligi bólimsheleri sý tasqynymen kúres jumystaryn kúsheıtti - V.Bekker
ASTANA. QazAqparat - Elimizdiń birqatar óńirinde sý tasqynymen kúres jumystary kúsheıtildi. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıng barysynda QR ІІM Tótenshe jaǵdaılar komıtetiniń tóraǵasy Vladımır Bekker málim etti.
«Aýa raıy málimetterin eskere otyryp, biz Іshki ister mınıstrliginiń Aqmola, Aqtóbe, Shyǵys Qazaqstan, Qostanaı jáne Soltústik Qazaqstan oblystaryndaǵy qutqarýshylar toptaryn jedel qutqarý bólimsheleri, órt sóndirý qyzmeti jáne apattyq qutqarý jumystary esebinen kúsheıttik. Búgingi kúni sý basqan 535 úıdiń 421-inen sý sorylyp alyndy, tótenshe jaǵdaı aýmaǵynan der ýaqytynda 969 adam qaýipsiz jerge kóshirilip, 17 adam qutqaryldy. Qazirgi ýaqytta 504 adam óz úılerine oraldy, 437-si týǵan-týystarynyń úılerine, al 28-i evakýatsııa beketterine ornalastyryldy», - dedi ol.
Komıtet basshysynyń aıtýynsha, sý tasqyny qaýpi týyndaǵan sátten 2488 iri qara men usaq mal qaýipsiz jerge kóshirilse, búgingi kúni olardyń 1500 basy ıelerine qaıta jetkizildi.
«Búgingi kúni tótenshe jaǵdaılar aýmaǵynda 36 myńnan astam ýaqytsha bóget turǵyzylyp, 145 myńnan astam qap ınertti materıal tóseldi, 1 mln. tekshe metrden astam tasqyn sý aıdaldy», - dedi V.Bekker.
Onyń sózine qaraǵanda, sý tasqynymen kúres jumystaryna 4127 adam, 1140 tehnıka, 259 sý sorǵysh qurylǵy, 41 qaıyq jumyldyrylǵan.
