Іshki ister mınıstrligi asa aýyr qylmystardyń tergeý merzimin aıtarlyqtaı qysqartýdy kózdep otyr - Senat otyrysy
ASTANA. Qyrkúıektiń 16-sy. QazAqparat /Aıdar Ospanalıev/ -Búgin Parlament Senatynyń jalpy otyrysynda depýtattar «Qazaqstan Respýblıkasynyń Qylmystyq is júrgizý kodeksine sotqa deıingi jeńildetilgen is júrgizý máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda qarap, tıisti ózgeristermen Májiliske qaıtardy,
dep habarlaıdy QazAqparat.
Otyrys barysynda atalmysh qujatqa baılanysty baıandama jasaǵan Іshki ister mınıstri Serik Baımaǵambetovtyń aıtýynsha, zań jobasy qylmystyq isten kúdikti azamatqa qatysty naqty aıǵaqtary bar asa aýyr emes qylmystar boıynsha is júrgizýdiń sotqa deıingi rásimin ońaılatýǵa baǵyttalǵan. «Qazirgi tańda aldyn ala anyqtaý men tergeý barlyq qylmystarǵa qatysty júrgiziledi. Óıtkeni qoldanystaǵy tergeý rásimi keńestik júıeniń tártibin saqtap qalǵan. Sonyń saldarynan qazir qylmystyq protseske qatysýshy azamattar ishki ister jáne ózge de organdarǵa birneshe ret shaqyrylady jáne olarǵa qatysty kóptegen tergeý áreketteri júrgiziledi. Olardan ýchaskelik ınspektorlar men tergeýshiler, anyqtaýshylar odan soń sot ókilderi barlyǵy da jaýap alady. Nátıjesinde jeńil qylmystyq iske qatysty kúdikti óziniń kinásin moıyndap, qajetti derekter jetkilikti bolsa da birneshe aı boıy tergeledi», dedi mınıstr.
Onyń aıtýynsha, jańa zań jobasynda usynylyp otyrǵan ózgerister osy máselelerdi retteıdi. Nátıjesinde asa aýyr emes qylmystar boıynsha tıisti materıaldar sottyń qaraýyna aınalasy 10 kúnniń shamasynda jiberiledi. Al sot óz kezeginde prokýror men advokattyń jáne basqa da osy protseske qatysýshylardyń aralasýymen berilgen materıaldardy az ǵana ýaqyt ishinde qarastyryp, tıisti azamattyń kinási men jazasyn belgileıdi. «Sóıtip, bir jaǵynan aýyr emes qylmystardy tergeýdiń merzimi qysqaryp, jemqorlyq áreketterine tosqaýyl qoıylady» dedi S.Baımaǵambetov.
