Іshki ister mınıstri polıtseıler ózine tán emes qyzmetten bosatylatynyn aıtty
NUR-SULTAN. QazAqparat – Búginde 12 myń polıtsııa qyzmetkeri tek nysan kúzetip otyr. Bul týraly QR Іshki ister mınıstri Erlan Turǵymbaev málim etti, dep habarlaıdy QazAqparat tilshisi.
Búgin Parlament Senatyndaǵy Úkimet saǵatynda 2019-2021 jyldarǵa arnalǵan ishki ister organdaryn jańǵyrtý boıynsha Jol kartasyn iske asyrý taqyryby talqylandy.
Polıtsııany ózine tán emes fýnktsııalardan bosatý máselesine toqtalǵan mınıstr, «Memlekettik organdardyń jáne zańdy tulǵalardyń 72 kúzet nysany básekelestik ortaǵa berildi. Sporttyq jáne mádenı-kópshilik is-sharalardyń qaýipsizdigin qamtamasyz etýge ishki ister organdary bólinisterin jappaı tartý praktıkasy qysqartyldy. Endi buqaralyq is-sharalardyń uıymdastyrýshylary jeke kúzet qurylymdarynyń qyzmetkerlerin jáne eriktilerdi tartady», - dedi.
Onyń sózine qaraǵanda, kúzet boıynsha taǵy 662 nysandy (qazynashylyq, salyq qyzmetteri, qoımalar, sottar, prokýratýra) básekelestik ortaǵa berý máselesi pysyqtalýda.
«Búginde 12 myń polıtsııa qyzmetkeri tek nysan kúzetip otyr. Olarǵa qylmystyń betin ashý , quqyqbuzýshylyqtyń aldyn alý boıynsha jumystar júktelmegen», - dedi Erlan Turǵymbaev.
Onyń aıtýynsha, elimizde 5 100 kúzet qurylymy bar, olar Іshki ister mınıstrligimen lıtsenzııalanǵan. Atalǵan kúzet qurylymdarynyń ishinde tek 2800-i ǵana qyzmet etýde. Osy oraıda olarǵa kúzet naryǵynda jumys bolmaı tur.
«Bizde mamandandyrylǵan kúzetshiler 98 myńǵa jetti. Olarda kúzet qyzmetine lıtsenzııasy bar, sondaı-aq olarǵa qarý ustaýǵa quqyq berilgen», - dedi vedomstvo basshysy.
