Іshki ister mınıstri men Astana ákimi elordalyq polıtseılerge jańa úıden páter kiltterin tabys etti
TANA. 19 qazan. QazAqparat /Gúlmıra Alıakparova/ - Búgin Astana qalasy Іshki ister departamentiniń 108 qyzmetkeri jańa úıden páter kiltterin aldy.
Saltanatty sharaǵa QR Іshki ister mınıstri Qalmuhanbet Qasymov pen Astana ákimi Imanǵalaı Tasmaǵambetov qatysty.
Jalpy aýmaǵy 8 947 sharshy metrdi quraıtyn jańa turǵyn úı kesheni «Saryarqa» aýdanynda K.Baıseıitova kóshesinde boı kóterdi. Ekonom sanatyndaǵy baspana turǵyn úı kezeginde turǵan Astana qalasynyń ishki ister organdary qyzmetkerlerine arnalǵan. Qonys toıyn toılaýshylar arasynda ІІM organy qyzmetkerleriniń qyzmettik mindetin atqarý kezinde qaza tapqandardyń, jas jáne kópbalaly otbasylarǵa jatatyndardyń, sondaı-aq múgedek balalardy tárbıeleıtin qyzmetkerlerdiń otbasy ókilderi bar. Onymen birge, kiltterdi ýchaskelik ınspektorlar men patrýldik-polıtsııa qyzmetkerleri, aýǵan soǵysynda bolǵan polıtseıler aldy.
Jeke quramdy qýanyshtarymen quttyqtap, qala basshylyǵyna alǵysyn bildirgen Q.Qasymov: «Biz elde quqyqtyq tártipti nyǵaıtý máselesinde Elbasynyń jáne Úkimettiń udaıy qamqorlyǵyn sezinemiz. Ótken jyly Astana qalasynda ishki áskerdiń áskerı qalashyǵy salyna bastady. Eki aı buryn elordada emhanasy bar jańa gospıtaldyń irgesin qaladyq. Mine, búgin jeke quramymyz úshin turǵyn úı alyp otyrmyz», - dep atap ótti.
Óz kezeginde elorda ákimi, bıylǵy jyl Qazaq halqy úshin, elimiz úshin óte mańyzdy, tarıhı jyl ekendigin, osy jyldar boıy Prezıdent N.Nazarbaevtyń salıqaly saıasatynyń arqasynda elimiz ósip-órkendep kele jatqandyǵyn aıtty. «Jalpy maqtanarlyq jaǵdaılarymyz óte kóp. Bárin aıt ta, birin aıt. Onyń ishinde Astananyń orny bólek», - dedi ol.
Jyl saıyn Astana qalasynda 1 mln. 400 sharshy metr turǵyn úı tapsyrylady. «Munyń bári elimizdegi tynyshtyq pen berekeniń arqasynda bolyp jatqan dúnıe. Sondyqtan da, qazaq «Er - eldiń qorǵany»,- deıdi. Rasynda da Astanamyzdaǵy tynyshtyq bolsyn, tártip bolsyn, bári - sizderdiń eńbekterińizdiń arqasynda. El úshin, qala turǵyndary úshin jasap jatqan eńbekterińiz úshin rızashylyǵymyzdy bildire otyryp, qýanyshty kúnderińiz sátti bolsyn, amandyq-saýlyq ákelsin, úılerińiz tolǵan qýanysh bolsyn degen tilek aıtqym keledi», - dep túıindedi I.Tasmaǵambetov.
Astana qalasy ІІD qyzmetkerlerin áleýmettik qorǵaý máselesine, sonyń ishinde turǵyn úımen qamtamasyz etýge qala bıligi men ІІM basshylyǵy erekshe mán beredi. Atap aıtqanda, 2004 jyly Astana ákimdigi atalmysh sanat boıynsha kezekte turǵandarǵa Tilendıev kóshesinde ornalasqan kópqabatty úıden 112 páter berdi.
Sondaı-aq aıta keteıik, elordalyq polıtsııa garnızonynyń tártipke salynǵan jumysynyń arqasynda Astana qazirgi ýaqytta Qazaqstannyń eń qaýipsiz qalalarynyń biri bolyp tabylady. Qalada jasalatyn aýyr jáne asa aýyr qylmystardyń sany munda eń tómengilerdiń biri. 2011 jyldyń 9 aıynda kisi óltirý qylmystarynyń sany ótken jyldyń sáıkes kezeńine qaraǵanda 23,1 jáne qaraqshylyq 18 paıyzǵa azaıdy. Onymen birge, aýyr jáne asa aýyr qylmystardy ashý úrdisi jaqsardy.
