Іshki áýe tasymalymen aınalysatyn kompanııalarǵa IOSA sertıfıkatyn alýdy mindetteý zańsyz - N. Jumasultanov
ALMATY. QazAqparat- Qazaqstanda ishki áýe tasymalymen aınalysatyn jeke áýe kompanııalaryna halyqaralyq IOSA aýdıti sertıfıkatyn alýǵa mindetteý zańsyz. Bul týraly búgin Almatyda ótken baspasóz máslıhaty barysynda «BEK AIR» áýe kompanııasy dırektorlar keńesiniń tóraǵasy Nurlan Jumasultanov málim etti. Onyń aıtýynsha, bul áýe reısteriniń azaıyp, tarıftiń ósýine ákep soǵady.
«Ózderińizge belgili 2016 jyldyń 1 qańtarynan bastap, elimizde áýe kompanııalaryna turaqty ishki kommertsııalyq áýe reısterin oryndaýǵa ruqsat berýdiń jańa erejeleri kúshine endi. Ol boıynsha endi áýe kompanııalary Halyqaralyq áýe kóligi qaýymdastyǵynyń (IATA) IOSA (IATA-nyń óndiristik qaýipsizdik boıynsha aýdıti) sertıfıkatyn alýǵa mindetti. Al bul zańǵa qaıshy. Óıtkeni, IOSA standarttary QR ulttyq zańnamalaryna engizilmegen. Engizilse bir sári edi. Sondyqtan, QR Investıtsııalar jáne damý mınıstrligi Azamattyq avıatsııa komıtetiniń IOSA sertıfıkatyn alý týraly talaby orynsyz, sol úshin QR Investıtsııalar jáne damý mınıstriniń 2015 jyldyń 27-shi naýryzyndaǵy tıisti buıryǵy kúshin joıý tıis. Onyń ústine IATA - halyqaralyq kommertsııalyq úkimettik emes uıym. Ol áýe tasymaldaýshylaryn, áýejaılardy jáne tasymaldaý baǵyttaryn satý jónindegi agenttikterdi biriktiredi. Onyń standarttary tek usynystyq sıpatqa ıe. Oǵan múshe bolý mindetti emes. Al, Qazaqstan halyqaralyq quqyq sýbektisi retinde oǵan tipti múshe bola almaıdy. Sondyqtan, otandyq áýe kompanııalarynyń qyzmeti ulttyq zańnama negizinde sertıfıkattaý jáne ulttyq standarttarǵa sáıkestigin tekserý arqyly júzege asyrylýy tıis», - dedi N. Jumasultanov.
Sonymen qatar, onyń aıtýynsha, halyqaralyqIOSA sertıfıkattaryn alý óte qymbat turady. Sertıfıkattyń óz baǵasy 60 myń dollardaı turǵanymen, aýdıtorlardy shaqyrý, olardyń jol shyǵyndary, qonaq úıge ornalastyrý, tamaqtandyrý jáne basqa da shyǵyndaryn qosqanda bul soma 1,5 mln. dollarǵa jetip jyǵylady. Al bul jeke áýekompanııalary úshin aýyr salmaq. Onyń ústine sertıfıkattyń bary-joǵy ushý qaýipsizdigin qamtamasyz etýge kepildik bere almaıdy.
Aıta ketelik, QR Investıtsııalar jáne damý mınıstrligi Azamattyq avıatsııa komıtetiniń talaby boıynshaIOSA aýdıtorlyq sertıfıkatyn almaǵan áýe kompanııalary 2016 jyldyń 1 qańtarynan ishki reısterden shettetilýi tıis bolatyn. Biraq, osylaısha ishki turaqty reısterdiń jabylý qaýpi týyndady. Osyǵan baılanysty, ishki reısterge ázirge shekteý qoıylmaıtyn boldy. Qazirgi tańda ishki turaqty reısterdi oryndaýmen aınalysatyn alty qazaqstandyq áýe kompanııasynyń ekeýi IOSA sertıfıkatyn alǵan. Olar: «Eır Astana» jáne «SCAT». Jańadan qurylǵan «Qazaq Air» áýekompanııasynyń IOSA úshin 2 jyldyq jeńildik kezeńi bar eken. Degenmen kompanııada sertıfıkatty alýǵa daıyndyq jumystary bastalyp ketipti. Al «Bek Eır», «Jezqazǵan Eır» jáne «Jetisý» áýe kompanııalarynyń IOSA sertıfıkattary ázirge joq.
Qazirgi tańda «Bek Eır» - 19 baǵdar, «Jezqazǵan Eır» - 1 baǵdar, «Jetisý» - 1 baǵdar boıynsha áýe reısterin oryndaıdy.
