Іshki áýe reısteriniń jandanýy: PTR test anyqtamasy joq 13 jolaýshy joldan qaldy
ALMATY. QazAqparat – Almatydan Nur-Sultanǵa jáne keri baǵytta ushqysy kelgen keıbir jolaýshylardy ushaqqa otyrǵyzylmady. Sebebi qoldarynda koronavırýsqa ótkizgen test nátıjeleri týraly anyqtamalary bolmaǵan, dep habarlaıdy QazAqparat tilshisi.
1 mamyrda, eki qala arasyndaǵy áýe reısi ashyldy. Ony Air Astana, QAZAQ AIR, Scat áýe kompanııalary oryndady.
SCAT áýe kompanııasynyń málimetinshe, alǵashqy reıste 119 jolaýshy boldy.
«Belgilengen kestege sáıkes, Almatydan bas qalaǵa kún saıyn tańǵy saǵat 9.55-te, Nur-Sultannan ońtústik astanaǵa kún saıyn, túski saǵat 12:40-ta ushatyn bolady. Aldaǵy ýaqytta kompanııa jıilik sanyn kóbeıtýdi josparlap otyr», - dep habarlady SCAT áýekompanııasy.
Sonymen qatar, kompanııa Almaty—Nur-Sultan baǵyty boıynsha 6 jolaýshynyń ushpaı qalǵanyn málim etti. Olardyń qoldarynda PTR test anyqtamasy bolmaǵan.
Dál osyndaı jaǵdaılar «Eır Astana» jolaýshylarynyń arasynda da kezdesti.
«Nur-Sultanda bir jolaýshynyń, Almatyda 6 jolaýshynyń koronavırýsqa tapsyrǵan test anyqtamasy bolmady», - dep habarlady «Eır Astana» AQ baspasóz qyzmeti.
1 mamyrdan bastap Astana men Nur-Sultan arasyndaǵy josparlanǵan reıster kúnine 3 ret tańerteń, tústen keıin jáne keshke Airbus 320/321 jáne Embraer E190-E2 ushaqtarymen oryndalady.
Tótenshe jaǵdaıdan keıin «Eır Astana» kompanııasy, onyń ishinde FlyArystan, basqa ishki baǵyttarǵa reısterdi qalpyna keltiredi.
«Barlyq talaptardy oryndaý úshin jolaýshylar áýejaıǵa 2 saǵat buryn kelýi kerek. Salonda erekshe qashyqtyqty saqtap otyrǵyzý erejesi saqtalady. Tamaq bir rettik ydyspen beriledi. Sondaı-aq, jolaýshylar maska taǵyp otyrady»,– dep atap ótti Eır Astanadan.
Qalalar arasyndaǵy alǵashqy reıstiń sátti aıaqtalǵanyn QAZAQ AIR áýe kompanııasy da habarlady. Jolaýshylardy tirkeý, otyrǵyzý jáne ushý kezinde bas memlekettik sanıtarlyq dárigerdiń barlyq talaptary saqtaldy. Avıakompanııa qyzmetkerleri medıtsınalyq tekserýden ótti. Bort serikteri jolaýshylar arasyndaǵy qaýipsiz qashyqtyqty baqylaýdy qamtamasyz etti.
Eske sala ketsek, 4 mamyrdan bastap Nur-Sultan men Almatydan Qyzylordaǵa, Petropavlǵa, Óskemenge jáne Semeıge áýe qatynastary qaıta jandanady.
