Іshki áýe reısterinde tarıf kóterilmeıdi
ASTANA. QazAqparat - Qazaqstannyń ishki áýe reısterinde bılet baǵasy kóterilmeıdi. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte Tabıǵı monopolııalardy retteý agenttigi tóraǵasynyń orynbasary Asylbek Dúısebaev málim etti.
Onyń atap ótýinshe, agenttiktiń halyqaralyq reısterdiń baǵalaryn retteýge quzireti joq. Tek Qazaqstannyń ishki reısterin atqaratyn «Eır Astana» men «Skat» áýekompanııalarynyń ǵana tarıfterine shekti baǵa engize alady. Onyń ózinde tek 36 baǵyt boıynsha ǵana.
«Búginde kompanııalardyń baǵany tómendetýine múmkinshilikteri bar. Biz oǵan bóget jasamaımyz», - dedi ol.
Agenttik tóraǵasy orynbasarynyń sózine qaraǵanda, áýe tarıfteriniń ósýi avıa kerosın baǵasynyń ósýimen tikeleı baılanysty. Óıtkeni avıakompanııa shyǵyndaryndaǵy kerosın úlesi 30 paıyzdy quraıdy.
«Demek, kerosın baǵasy joǵarylasa, tarıftiń de kóteriletindigi túsinikti. Al qazirgi ýaqytta avıakompanııalardan bizge tarıfterdi ózgertýge ótinish túsken joq. Sondyqtan aldaǵy ýaqytta tarıftiń kóterilýi oryn almaıdy», - dedi A.Dúısebaev.
