Іshki aýdıtorlar revızorlyq tásilden aryla almaı keledi - vıtse-mınıstr
Jıynǵa memlekettik jáne jergilikti organdardan, Qarjy mınıstrligi Іshki memlekettik aýdıt komıtetinen jáne Esep komıtetinen 300-ge jýyq aýdıtor jınaldy. Olar úzdiksiz aýdıtti is júzinde qoldaný tájirıbesimen bólisip, qazaqstandyq kompanııalardyń ishki aýdıt ınnovatsııalaryna daıyndyǵy jóninde pikir almasty.
«Qazaqstandaǵy ishki memlekettik aýdıtti reformalaý Elbasy Nursultan Nazarbaev usynǵan «100 naqty qadamnyń» 93-qadamynda aıtylǵan. Onda Qazaqstannyń kásibı aýdıtorlyq qaýymdastyǵyn qurýdyń mańyzdy ekeni aıtylǵan. Zańda ishki jáne syrtqy aýdıtti bólip kórsettik. Bir jaǵynan, olardyń esh aıyrmashylyǵy joq sııaqty. Biraq, ishki memlekettik aýdıt nemese aýdıtor - uıymnyń basqarý komandasynyń bir bóligi. Al syrtqy aýdıt barlyq aqparatty ádil túrde ashýǵa baǵyttalady», - dedi QR Qarjy vıtse-mınıstri Rýslan Beketaev konferentsııanyń ashylý saltanatynda.
Sonymen birge, vıtse-mınıstr ishki aýdıt qyzmetteriniń 2018 jyly úlken jumys atqarǵanyn atap ótti. Olar kóptegen uıym ishinen aýqymdy zańbuzýshylyqtar tapqan. Biraq, R. Beketaev ishki aýdıttiń negizgi maqsaty - zańbuzýshylyqty tabý emes, jumys tásili men mádenıetti ózgertý ekenin jetkizdi.
«Biz úshin baǵyt aýystyrý óte mańyzdy. Aýdıttiń úsh quraýshysy bar: aýdıtorlardyń kásibı sapasy, aýdıtordyń uıym ishindegi jaǵdaıy jáne onyń mádenıeti. Búgingi aýdıtorlar ókinishke qaraı, baqylaý men revızorlyq tásilden aryla almaı keledi. Bul júıeni ózgerte almaı kelemiz. Menińshe, ishki jaǵdaıdy ózgertip bastaǵan jón», - dedi ol.
Onyń aıtýynsha, ishki aýdıt qyzmetteri uıymnyń qatelikti taýyp, jazalaıtyn «bógde zat» bolmaýy tıis.
«Іshki ózgerister boıynsha aldymyzda úlken mindet tur. Biz kez kelgen usynymdy qabyldaımyz, zańnamalyq aktilerdi ózgertýge daıynbyz. Eń bastysy - ishki memlekettik aýdıtorlardyń mádeınetin ózgretý», - dedi vıtse-mınıstr.
