Іshki áskerler qolbasshysy jumysynan shettetilgen qaramaǵyndaǵy eki ofıtserdiń máselesiniń mán-jaıyn túsindirip berdi
ASTANA. 4 sáýir. QazAqparat - Búgin Astanada ótken brıfıngte QR ІІM Іshki áskerler qolbasshysy Rýslan Jaqsylyqov sońǵy kúnderi memlekettik satyp alýlardaǵy zań buzýshylyqqa qatysy bar degen kúdikpen jumysynan shettetilgen qaramaǵyndaǵy eki ofıtserdiń máselesiniń mán-jaıyn túsindirip berdi.
Aıta keteıik, buǵan deıin buqaralyq aqparat quraldarynda elimizdiń qarjy polıtsııasy atalǵan vedomstvonyń Memlekettik satyp alýlar basqarmasynyń bastyǵy Oleg Zaıka men Jaýyngerlik qyzmet basqarmasynyń bastyǵy ıÝrıı Grıbaǵa qatysty qylmystyq is qozǵaǵany habarlanǵan bolatyn. Olar qyzmettik laýazymdaryn asyra paıdalandy degen kúdikpen tekserilýde.
R. Jaqsylyqovtyń aıtýynsha, bul másele eki jyl burynǵy tenderge qatysty bolyp otyr. Komıtet kúzet qyzmetteri úshin radıolokatsııalyq quraldardy satyp aldy. Bul jabdyqtar bas bostandyǵynan aıyrý mekemelerinde ornatylatyn quraldar. Olar quny 45 mln. 560 myń teńgeni quraıdy.
«Tender ótkizildi. Atalǵan múlik jetkizildi. Barlyǵy da túgel jáne olar tıisti nysandarda ornatyldy. Eki jyldyń ishinde bul quraldar eshbir aqaýsyz jumys istep kele jatyr. Tekserý kezinde bul quraldar biz tapsyrys bergen tehnıkalyq talaptarǵa saı kelmeıtini anyqtaldy. «Memlekettik satyp alýlar týraly» Zańǵa sáıkes jabdyqtardyń dáldigine tapsyrys berýshi emes, kerisinshe ony jetkizýshi jaýap beredi. Sondyqtan da osy taýardy jetkizgen fırmaǵa qatysty biz sotqa talap-aryz jazdyq. Al sot talap-aryzdy qanaǵattandyrǵan joq jáne memleketke shyǵyn keltirilmegen degen sheshim shyǵardy»,-dedi qolbasshy.
Qolbasshysy tergeý amaldary júrip jatqandyǵyn jáne atalǵan laýazymdy tulǵalar búgindegi tekserý sharalary kezeńinde ózderiniń qyzmettik mindetterinen shettetilgenin, sondaı-aq eger de kináliler anyqtalsa olar tıisti jazasyn alatynyn jetkizdi. «Atalǵan azamattarǵa qatysty eshqandaı da resmı aıyp taǵylǵan joq»,-dep túıindedi ol.
