Іshimdik ishý «araly», páterin shatastyrǵan stýdent, «jalańash» shyrsha - Merekedegi qyzyqty oqıǵalar
ASTANA. QazAqparat - Jyl saıyn Jańa jyl merekesinde kóptegen qyzyqty oqıǵalar oryn alyp jatady. Mundaı oqıǵalar kezdeısoq ta bolady. Keıde ony adamdardyń ózi qoldan jasaıdy. Tabaldyryqtan engen 2018 jyly da birqatar qyzyqty sáttermen tolyqty, dep habarlaıdy QazAqparat.
Jańazelandııalyqtar ishimdik ishý úshin sý ortasynan «aral» turǵyzdy
Bir top jańazelandııalyqtar jańa jyldy taza aýada toılaý úshin jáne qoǵamdyq oryndarda ishimdik ishýge salynǵan tyıymdy aınalyp ótý úshin jaǵa mańynda kishigirim aral turǵyzǵan, dep habarlady VVS. https://www.bbc.com/russian/other-news-42536185
Jergilikti BAQ-tyń habarlaýynsha, aral Taırýa ózeniniń saǵasynda turǵyzylǵan. Onda ústel men sýsyndardy salqyndatý úshin muz salynǵan jáshik qoıǵan. Ózen sýy qaıta tolǵanda, araldyń aınalasyn sý basqan jáne osylaısha, aral turǵyzýshylar spırtti ishimdik ishýge salynǵan resmı tyıymnan bosatylǵan. Olar aralda tutas jańa jyl túnin ótkizip, otshashýdy tamashalaǵan.
Koromandel qalasynyń bıligi jańajyldyq mereke kezinde qoǵamdyq oryndarda spırtti ishimdik ishýge tyıym salyp, 250 jańazelandııalyq dollar (180 AQSh dollary) kóleminde aıyppul engizgen. Alaıda, kútpegen bastamaǵa bılik ókilderi qaljyńmen jaýap bergen. «Jaqsy ıdeıa eken - muny bilgende, men de olarǵa qosylar edim», - dedi jergilikti polıtsııa basshysy, ınspektor Djon Kellı.
Almatyda belgisiz adamdar úrlemeli Aıaz Atany «uryp-soqqan»
Almatyda belgisiz adamdar úrlemeli Aıaz Atany uryp-soqqan. Úrlemeli Aıaz atamen tóbelesti kýágerler túsirip alǵan, dep jazdy InAlmaty.kz. https://www.inalmaty.kz/ Oqıǵa 1 qańtar kúni 00.20-te Satbayev University mańynda bolǵan.
Ýfa turǵyny shyrsha túbinen uıyqtap jatqan er adamdy taýyp alǵan
«AıF-Ýfa» gazetiniń habarlaýynsha, E.Rıazanovtyń «Taǵdyr tálkegi nemese jeńil býyńyzben» fılmindegi oqıǵa Bashqurtstan turǵyny Albına Markovanyń úıinde qaıtalanǵan.
Tańerteń kúıeýin jumysqa shyǵaryp salǵan Albına esikti jaýyp, dýshqa kirgen. Dýshtan shyqqanda, uly páterge beıtanys er adamnyń kirgenin jetkizgen. Ol qonaq bólmedegi shyrshanyń túbinde uıyqtap qalǵan.
Albına ulyn alyp, jýyný bólmesine jasyrynǵan jáne kúıeýine habarlasqan. Kúıeýi kútpegen qonaqty oıatýǵa tyrysqan biraq qonaqtyń sóıleıtin shamasy bolmaǵan. Sómkesinen medıtsınalyq oqý ornynyń 4-kýrs stýdentiniń synaq kitapshasy tabylǵan. Oqıǵadan soń, Albına jas jigittiń Instagramdaǵy paraqshasyn tapqan jáne stýdenttiń túngi klbýtarǵa jıi baratynyn kórip, páterdi nelikten shatystyryp alǵanyn túsingen.
AQSh-ta egizder túrli jyldary dúnıege keldi
Jańa jylda Kalıfornııa aýrýhanasynda egizder araǵa 20 mınýt salyp, túrli aıda jáne túrli jylda dúnıege keldi, dep jazdy «Izvestııa» basylymy. .
Amerıkalyq BAQ-tyń habarlaýynsha, Hoakın jáne Aıtana de Hesýs Ontıverostar Delano qalalyq aýrýhanasynda týǵan. Alǵashqy sábı - ul bala 2017 jyldyń 31 jeltoqsanynda jergilikti ýaqytpen 23:58-de týsa, onyń syńar qaryndasy 20 mınýttan keıin, 1 qańtarda 00:16-da jaryqqa kelgen.
Shaqalaqtardyń ata-anasy - Marııa men onyń kúıeýi Hoakın Erlımat qalasynda turady. Olardyń úsh qyzy bar.
Italııada saýda ortalyǵyndaǵy shyrsha urlandy
Neapoldiń tanymal saýda ortalyqtarynyń birinde saltanatty túrde ashylǵan jańajyldyq shyrsha bir táýlikten keıin qoldy boldy, dep jazady korrespondent.net.
Umberto I galereıasynda Gran Caffe Gambrinus syılaǵan jańajyldyq shyrshany urylar aramen kesip áketken. Ornynda ásem shyrshanyń birneshe butaǵy men aýdarylǵan tostaǵany ǵana qalǵan.
Kıshınevte «jalańash» shyrsha ornatyldy
Kıshınevte Karpattan jetkizilgen shyrsha úshin janjal týyndady, dep habarlaıdy strana.ua. Durys jetkizilmeý kesirinen aǵashqa qatty zaqym kelgen. Keı butaqtaryn jumysshylar kedergi keltirmesin dep, kesip tastaǵan. Turǵyndardyń narazylyǵynan soń, qala bıligi shyrshany aýystyrdy. Biraq, jańa shyrsha daýǵa ushyrady, sebebi aǵashty balabaqsha aýmaǵynan kesip ákelgen.
