Isekeshev tapsyrmany oryndatýdyń jańa mehanızmderin engizip jatyr
ASTANA. QazAqparat - Astanada taǵy bir sarapshylar alańy ashyldy. Astana Expert Club-yn qurý jumysyna "Nur Otan" partııasynyń qalalyq fılıaly da atsalysyp otyr, dep xabarlaıdy QazAqparat tilshisi.
Fılıal basshysynyń orynbasary Baqyt Saparovtyń aıtýynsha, "Astana Expert Club" sarapshylar klýby qala ákimi Áset Isekeshevtiń jeke tapsyrmasy boıynsha qurylyp otyr. "Al klýbty qurý ıdeıasyna keler bolsaq, Áset Órentaıuly óz qyzmetine kiriskennen keıin birqatar ózekti máseleler boıynsha san alýan jıyndardy ótkizgen bolatyn. Máselen, Astana qalasynyń kóliktik kesheni damytýǵa arnalǵan úlken qoǵamdyq tyńdaý uıymdastyryldy. Oǵan qala turǵyndary, sarapshylar, osy saladaǵy memlekettik organdar men kompanııalardyń ókilderi qatysqan edi. Qoǵamdyq tyńdaýlar barysynda kóptegen máseleler kóterildi, tuşymdy usynystar aıtyldy. Alaıda ákimniń bergen tapsyrmalary men qala turǵyndarynyń usynystaryn oryndaý jumysy iske aspaı qaldy. Sondyqtan osy ispetti sarapshylar klýbyn qurý ıdeıasy týyndady", - dedi Saparbaev klýbtyń alǵashqy otyrysynda.
Onyń sózine qaraǵanda, aldaǵy ýaqytta sarapshylar klýbynyń otyrystarynda kólik máseleleri ǵana emes, bilim, densaýlyq jáne taǵy basqa áleýmettik-ekonomıkalyq mańyzy bar problemalar qaralatyn bolady.
"Endigi kezekte biz belgili bir máseleni talqylap, odan keıin jan-jaqqa tarap ketpeı, naqty bir baqylaý júıesin engizýimiz kerek. Biz "Nur Otan" retinde bárin partııalyq baqylaýǵa alýǵa daıarmyz. Máselen, búgin jolaýshylar kóligi basqarmasy qatysyp otyr. Sonymen birge arnaıy jol kartasyn ázirlep, tıisti sharalardy iske asyratyn bolamyz", - dep atap kórsetti partııanyń múshesi.
Aıta keteıik, búgingi jıynda qalalyq jolaýshylar kóligi basqarmasynyń basshysy Bekmyrza Igenberdıev baıandama jasap, qalanyń kóliktik keshenin damytý jaıynda aıtyp berdi. Al qatysýshylar qoǵamdyq kólik júıesin damytýǵa qatysty óz usynystaryn ortaǵa saldy.
