Isekeshev Shahandaǵy apattan qaza tapqandardyń otbasylaryna kóńil aıtty
ASTANA. QazAqparat - Astana qalasynyń ákimi Áset Isekeshev óziniń Feısbýktaǵy paraqshasy arqyly Shahandaǵy apattan qaza tapqandardyń otbasylaryna kóńil aıtty, dep habarlaıdy QazAqparat.
«Shaxtınsk qalasynda keshe túnde oryn alǵan apattan qaza tapqan azamattardyń otbasylaryna búkil astanalyqtardyń jáne jeke ózimniń atymnan kóńil aıtamyn. Apattyń arty qaıyrly bolsyn!», - dep jazdy Isekeshev.
Eske sala keteıik, 1 qańtar kúni 22:40-ta Qaraǵandy oblysy TJD qutqarý bólimine Shahtınsk qalasy Shahan kentindegi kópqabatty úıdiń bir bóligi opyrylyp túskeni týraly qońyraý shalynǵan. Oqıǵa ornyna shuǵyl túrde TJD qutqarýshylary jóneltilip, turǵyndar qaýipsiz jerge kóshirildi . Áýeli 1 adamnyń máıiti úıindi astynan shyǵarylǵan bolatyn. Keıin ekinshi turǵynnyń denesi úıindi astynan tabyldy. Qazirgi ýaqytqa deıin úıindi astynan 9 kóz jumǵan adamnyń denesi arshyp alyndy. Onyń úsheýi er adam, úsheýi áıel, úsheýi bala. Balanyń bireýi 2016 jylǵy, ekinshisi 2010 jylǵy.
