Isekeshev sapasyz salynǵan úıler týraly: Bárin tekseremiz
ASTANA. QazAqparat - Astana qalasynyń ákimi qurylysy sapasyz júrgizilgen úılerdiń barlyǵy boıynsha komıssııa qurýǵa ýáde berdi, dep habarlaıdy «QazAqparat» HAA tilshisi.
Áset Isekeshevtiń halyqqa esep berý kezdesýinde turǵyndardan jańadan salynǵanymen, jóndeýdi talap etetin úıler týraly saýal qoıyldy.
«Astanada memlekettik baǵdarlama boıynsha úıler kóptep salynyp jatyr. Alaıda qurylysy aıaqtalǵannan keıin ol alǵan úıimizge qaıta jóndeý júrgizýge týra keledi. Osy sebepti, úıdi qabyldaǵan kezde sapasyna kóbirek mán berýlerińizdi suraımyz», - dedi turǵyndardyń biri.
Áset Isekeshev bul saýalǵa jaýap berip, barlyq shaǵymdar jaýapsyz qalmaıtynyna sendirdi.
«Bul óte mańyzdy másele. Buǵan qatysty maǵan da, ákimdikke de óte kóp shaǵym kelip túsedi. Bizdiń maqsattardyń biri - qurylys sapasyn jaqsartý. Ár jaǵdaı boıynsha biz komıssııa quramyz. Bárin tekseremiz, tıisti sharalardy qabyldaımyz. Meniń birinshi orynbasarym Sergeı Horoshýn osy máselege jaýapty. Sondyqtan, jyl ótken saıyn jaǵdaı jaqsarady», - dedi Áset Isekeshev.
Budan keıin sóz alǵan qala ákiminiń birinshi orynbasary Sergeı Horoshýn Astanada osy baǵytta ylǵı shaǵym túse beretin 15 nysan baryn aıtty.
«Atalǵan máseleni jaýapty organdarmen apta saıyn talqylaýdan ótkizemiz», - dedi ákimniń orynbasary.
