Isekeshev osy aptadan bastap ákimniń jumysyn jarııaly etpek
ASTANA. QazAqparat - Astana ákimi Áset Isekeshev memlekettik organnyń qyzmetiniń ashyqtyǵy men jarııalylyǵyn qamtamasyz etýge baılanysty jumystar týraly aıtty.
«Memleket basshysynyń 5 ınstıtýtsıonaldy reformasynyń «Ashyq jáne jarııaly qoǵam» baǵytyn júzege asyrý maqsatynda jáne elorda ákimdiginiń jumysyn ashyq etý úshin jumystar júrgizýdemiz. Qańtar aıynan bastap, barlyq qalalyq qyzmet túrleriniń «ashyq esik» kúnderi ótip jatyr, sondaı-aq barlyq adan ákimderi esep berýde. Al, meniń ákim retindegi esebim 16 aqpan kúni ótedi»,-dep jazdy Áset Isekeshev feısbýktegi paraqshasyna.
«Júıeli jumystar boıynsha (KIK, turǵyn úı qorynyń jaǵdaıy, qoǵamdyq kólik) qoǵamdyq tyńdaýlar ótkizildi. Qazirgi tańda bul baǵyt boıynsha barlyq usynystar men máseleler qaralýda. Jaqyn arada men osy mindet boıynsha jumystardyń qorytyndysy týraly habardar etemin. Endigi kezekte densaýlyq saqtaý, ekologııa, bilim berý, ekonomıka men ózge de salalar tur. Atalǵan baǵdarlamalardyń barlyǵy qabyldanyp, turǵyndar men sarapshylardyń pikirleri negizinde túzetiletin bolady. Qalalyq qyzmetter táýlik boıyna qyzmet kórsetýde jáne kún saıyn komıssııa májilisteri men jumys toptarynyń otyrystary, aǵymdaǵy máseleler boıynsha májilister ótip jatyr. Apta boıyna damýdyń júıeli máseleleri talqylanatyn sharalar júzege asyrylýda. Osy aptadan bastap, talqylanatyn máseleler týraly aqparattar ashyq bolady. Sársenbi saıyn ákimdiktiń májilisi ótedi, ár seısenbi qala qurylysy keńesiniń májilisi, juma kúni qalany EKSPO kórmesine daıyndaý shtabynyń otyrysy men kóptegen iri baǵdarlamalar men jobalar júzege asyrylatyn jıyndar ótedi»,-delingen.
