Isekeshev qaıta jóndelgen aýlalar men joldardyń sapasyn tekserdi

ASTANA. QazAqparat - Búgin Astananyń Saryarqa aýdanynda jańa aýla ashyldy. Jalpy aýdanda 30 úıdiń aýlasy qaıta abattandyrylyp, kireberis joldar jóndeldi. Qala ákimi Áset Isekeshev atqarylǵan jumystardyń sapasyn tekserip shyqty, dep habarlaıdy QazAqparat elordanyń medıa ortalyǵyna silteme jasap.

«Memleket basshysy qala turǵyndarynyń ómirin jaqsartýǵa, balalar úshin yńǵaıly jaǵdaı jasaýǵa, salaýatty ómir saltyn qalyptastyrý men jastardy qoldaýǵa baǵyttalǵan tapsyrmalar júktegen bolatyn. Osy oraıda bıyl astana ákimdigi 370 aýlanyń qurylysyn aıaqtady. Oǵan qosa, 40 qoǵamdyq keńistik ashylady, olarda kólik turaqtary men trotýarlar, balalar, jastar jáne sporttyq trenajerlar qamtylady», - dedi Á. Isekeshev.

Sondaı-aq aǵymdaǵy jyly Saryarqa aýdanynyń aýmaǵynda kreatıvti jobalardy iske asyrý aıasynda turǵyn úılerdiń 21 aýlasyn abattandyrý josparlanýda.

Qazirgi ýaqytta Tilendıev, 36 meken jaıy boıynsha jumystar aıaqtaldy. 600-den astam otbasy turatyn turǵyn úıde sporttyq jattyǵý quraldary men balalar oıyn keshenin, fýtbol alańyn ornatý jáne kólik turaǵyn abattandyrý boıynsha jumystar atqaryldy.

Mundaı jumystardy 103 aýlada iske asyrý josparlanýda. Fýtbol jáne basketbol alańdary jóndeýden ótip, jańartylyp, boıaldy.

Budan bólek, úılerdiń aýmaǵyn jaryqtandyrý boıynsha jumystar atqarylýda.

«Jyl sońyna deıin 105 meken jaı boıynsha jóndeý júrgiziledi. Aǵymdaǵy jyly 229 turǵyn úıdiń aýlasyn abattandyrý josparlanýda. Bul jumystar 2017 jyldyń sońyna deıin aıaqtalady dep kútilýde», - delingen taratylǵan habarlamada.