Isekeshev Qabanbaı batyr dańǵyly boıyndaǵy jóndeý jumystaryn merziminen buryn aıaqtatty

ASTANA. QazAqparat - Elordanyń Qabanbaı batyr dańǵyly boıyndaǵy jol jóndeý jumystary merziminen buryn aıaqtalyp, erteń paıdalanýǵa beriledi. Bul týraly Astana qalasynyń ákimi Áset Isekeshev óziniń Feısbýktaǵy paraqshasynda habarlady.

«Búgin Qabanbaı batyr dańǵyly boıyndaǵy jóndeý jumystarynyń barysymen tanystym. Atalǵan jumystar erteń, ıaǵnı senbi kúni aıaqtalady. Bul buǵan deıin belgilengen ýaqyttan úsh kún buryn berilmek. Negizi, əý basta joldaǵy jóndeý jumystaryn tipti 10-qazanda aıaqtaý kózdelgen bolatyn. Astana jol basqarmasy jumysty barynsha jyldamdatýǵa tyrysyp, nátıjesinde senbi kúni tústen keıin jol paıdalanýǵa beriletin bolady», - dep jazdy qala basshysy.

Eske sala keteıik, atalmysh dańǵyldy jóndeý jumystary Astanada úlken keptelister týdyryp, halyq narazylyqtaryn bildirgen bolatyn. Keıin Á.Isekeshev keńes ótkizip, osy salaǵa jetekshilik etetin qala ákiminiń orynbasary Qosman Aıtmuhametovqa eskertý jasady. Sondaı-aq ol Avtomobıl joldary basqarmasynyń basshysy Symbat Myrzaǵulovty qyzmetinen bosatýdy, «Astana Teplotranzıt» AQ men «Astana sý arnasy» MKK basshylaryna qatań sógis, «Astana LRT» JShS basshysyna sógis jarııalaýdy tapsyrdy.

Astana qalasynyń ІІD men Jergilikti polıtsııa qyzmetine tıisti ýchaskelerde qajetti jol belgileri men kórsetkishterdiń qoıylmaýy sebepti týyndaǵan keptelister úshin jaýapty tulǵalardy anyqtap, jazaǵa tartý tapsyryldy.