Isekeshev elordalyqtardy kómirdi erterek satyp alýǵa shaqyrdy
ASTANA. QazAqparat - Áset Isekeshev Astana turǵyndaryna kómirdi erterek satyp alýǵa keńes berdi, dep habarlaıdy QazAqparat ákimdiktiń saıtyna silteme jasap.
Búginge deıin Astanada 7 kómir satýshy uıym bar, al 22 tamyzdaǵy jaǵdaı boıynsha halyqty qatty otynmen qamtýdyń qory 14 950 tonnaǵa jetken. Kómir satatyn oryndar men baǵasy týraly barlyq aqparatty 109 nomeri arqyly bilýge bolady. Jylý maýsymyna daıyndyq jospar boıynsha júrgizilýde, - dep málim etti Astana ákimi Úkimet otyrysynda.
Áset Isekeshevtiń aıtýynsha qala úshin qajetti otyn daıyn, onyń ishinde 200 myń tonnadan astam kómir, 6 myń tonnadan astam mazýt bar. Janar-jaǵarmaı qory kelesidegideı bólindi: qatty otyn - JEO-1-ge 42 007 tonna berildi, JEO-2 - 162 314 tonna. Mazýt boıynsha: JEO-1 - 3 203 tonna, JEO-2 - 3 036 tonna. Budan basqa, JEO-1 mazýttyń qosymsha 5 382 tonna qory bar. Normatıvtik 20 táýlikke jetetin kómir qory JEO-1-de búginde bir kúnge shaqqanda 36 140 tonnany quraıdy, al JEO-2 - bul kórsetkish 185 420 tonna.
«Turǵyn úılerdiń jylý maýsymyna daıyndyǵy 91%, áleýmettik nysandar - 97%, mádenı nysandar - 100%», - dedi Á. Isekeshev.
Otyn-energetıkalyq kesheni jáne kommýnaldyq sharýashylyq basqarmasynyń basshysy Erbol Tóleýovtiń málimetinshe Astanada negizgi 7 kómir satýshy uıym bar, al halyqqa qajetti jalpy kómirdiń qory 22 tamyzdaǵy jaǵdaı boıynsha 14 950 tonnany quraıdy. Máselen ótken jyly mamyrdan 6 tamyzǵa deıin Astanada (energııa kózderin qospaǵanda) 28,8 myń tonna jetkizilse, osy 2018 jyly osy ýaqyt aralyǵynda 35,3 myń tonna jetkizildi, bul 22,6 % kóp.
Alaıda Erbol Tóleýov kómirdiń qory kóp ekendigine qaramastan qala turǵyndarynyń qatty otyn satyp alýǵa asyqpaı, bul isti keıinge qaldyryp otyrǵanyn aıtty. «Astananyń» kómirin satyp alýshylar negizinen qalanyń shet mańynda turatyndar turǵyndar.
«Kúz-qys kezinde kómir satyp alýǵa baılanysty áleýmettik kıkiljiń bolyp jatady. Bul qatty otyn paıdalanatyn turǵyndardyń kún sýytqan kezde jappaı kómir satyp alýyna baılanysty. Nátıjesinde birkelki satylym bolmaı shyǵyp, kezek pen baǵa ósip ketedi. Astanada 31 013 jeke úı bar, olar kómirge muqtaj. «Almaty» aýdanynda - 6 380, «Baıqońyr» aýdanynda - 4 398, «Esil» aýdanynda - 8 530, «Saryarqa» aýdanynda - 11 705», - dedi E. Tóleýov.
Áset Isekeshev profıldi basqarmanyń basshysyna osy máseleni baqylaýǵa alýyn, iri kómir satýshylarmen munyń aldyn baǵany ósirmeý týraly memorandýmǵa qol qoıylǵandyǵyn eske saldy.
«Biz kómir satatyn iri kompanııalarmen erterek jınalyp, osy máseleniń bárin talqyladyq. Qazir biz taǵy da jınalyp, baǵany ósirýge jol bermeýge jáne jetkizýdiń kestesin keshiktirmeý týraly kelisimge qol qoıamyz», - dedi ákim.
Sonymen birge Á. Isekeshev qala turǵyndaryn aıqaı-shý men kezekke turyp qalmas úshin qatty otyndy keıinge qaldyrmaı erterek satyp alýǵa shaqyrdy.
Esterińizge sala keteıik, iKomek qalalyq ortalyq bazasynda halyqty kómir satatyn oryndar men baǵasy týraly keńes beretin tikeleı jeli (109 telefony) bar. Alaıda, osy qyzmettiń mamandarynyń aıtýynsha, qazirgi tańda bul qyzmet túri keńinen paıdalanylmaı otyr eken. Sońǵy aptada tikeleı jelige kómir satyp alý týraly nebary 10 adam ǵana qońyraý shalypty.
