Isekeshev elordadaǵy nysandardy múgedek jandarǵa beıimdeýdi qolǵa almaq
ASTANA. QazAqparat - Astana ákimi Áset Isekeshev jyl sońyna deıin elordadaǵy nysandardyń basym bóligin múgedek jandar úshin beıimdeýge ýáde berdi, dep habarlaıdy QazAqparat.
Búgin Úkimet otyrysynda QR Premer-Mınıstri Baqytjan Saǵyntaev Astana ákimi Áset Isekeshevten elordadaǵy nysandardy múgedektigi bar azamattar úshin beıimdeý jumystary týraly surady.
«Biz ózimizdiń qaýymdastyqtarmen, barlyq toptaǵy múgedek jandarmen birge shtab qurdyq. Qazir bizdiń jumys josparymyz ózgertilip jatyr. Jalpy, Astanada sońǵy tórt jylda tıisti ınfraquyrylymy bar nysandardyń 56%-i pasporttaýdan ótken», - dedi Áset Isekeshev.
Onyń sózinshe, josparǵa qalanyń barlyq nysandary - aýrýhanalar, mádenı, sporttyq nysandar, jaıaý júrginshi ótkelderi, dúkender, kommertsııalyq uıymdar engiziledi.
«Biz quzyrly mınıstrlik ókilderimen birge arnaıy jospar qurdyq, ony júzege asyra bastadyq, qalanyń túrli aýdandarynda qoljetimdi, kedergisiz ortany qurý boıynsha jumystardy atqaryp jatyrmyz. Árıne, qysqa ýaqytta barlyq problemany sheship tastaý múmkin emes, biraq biz ózimizge jyl ishinde nysandardyń basym bóligin tıisti ınfraqurylymmen qamtamasyz etýdi maqsat etip otyrmyz. Kedergisiz ortadan bólek ózge de baǵyttar bar - bul múgedekterdi jumyspen qamtý, saıabaqtarda sportpen shuǵyldanýǵa múmkindik beretin arnaıy sporttyq alańdar qurý jáne basqa da birqatar jumystar», - dep túıdi oıyn ákim.
Bunyń aldynda QR Eńbek jáne halyqty áleýmettik qorǵaý mınıstri Tamara Dúısenova Qazaqstandaǵy mektepter men aýrýhanalardy jartysy múgedekter úshin beıimdelmegenin habarlaǵan bolatyn.
