Isekeshev eki mektep pen bir balabaqshanyń jaýapty tulǵalaryna qatań sógis berdi
ASTANA. QazAqparat - Balabaqsha, mektepterdiń kireberis joldaryn qaýipsiz ári yńǵaıly etip salý kerek. Astana ákimi Áset Isekeshev birqatar nysandy aralaǵan kezde osyndaı tapsyrma berdi, dep habarlaıdy QazAqparat ákimniń baspasóz qyzmetine silteme jasap.
«Qolaıly qalalyq ortany jasaý isinde usaq-túıekter bolmaıdy, bul qaýipsizdik pen turǵyndarǵa yńǵaıly bolýǵa qatysty másele. Qalalyq qyzmet kórsetý de osy máseleni sheshýi tıis. Men muny jeke baqylaýymda ustaımyn jáne Ikomek qalalyq qyzmeti arqyly monıtorıng jasap otyramyn», - dedi elorda ákimi.
Ótken jyly 33 mektep qaıta qalpyna keltirilip, jol belgileri aýystyryldy, júretin joldardyń shyǵa berisi qaıta jóndelip, 11 bilim berý nysanynyń kólik turaǵy keńeıtildi. Josparly túrde jabyq tıptegi aıaldamalar ornatylyp, jaryqtandyrý júrgizilýde. Osy jyly taǵy 13 nysandaǵy jumystardy aıaqtaý josparlanǵan. 
Astana ákimi eń birinshi nysan, № 66 mektep-lıtseıge kelip toqtady. Munda dál qazirgi tańda oqý jylyna deıin aıaqtalýy tıis mektepke kire beris joldardyń tósem jumystary júrgizilip jatyr.
«Bul mekteptiń kire beris jolynyń joqtyǵyna baılanysty balalardyń ata-analary men muǵalimder birneshe ret shaǵymdanǵan bolatyn. Qazir joldyń qurylysy aıaqtalýǵa jaqyn. 1 qyrkúıekte jumystardyń bári bitedi», - delingen bilim basqarmasynyń habarlamasynda. 
Budan keıin Áset Isekeshev Máńgilik el dańǵylynyń boıyndaǵy № 76 jáne № 75 mektepke, №87 «Qadyr» balabaqshasyna bardy. Atalǵan nysandardyń jaýapty tulǵalaryna qatań sógis berildi. Á. Isekeshev az ýaqyt ishinde aıtylǵan kemshilikterdi joıýdy tapsyrdy.
«Barlyq osy nysandar boıynsha kire beris joldardy keńeıtip, kólik turaǵyn salyp, Á. Bókeıhan kóshesinen týra shyǵyp ketetin jol salý qajet. Jaqynda oqý bastalǵaly otyr. Kólik aǵyny kóbeıe túsedi. Biz balalardyń basyn qaýipke tige almaımyz. Sondyqtan barlyq jaýapty tulǵalarǵa jýyq arada osy máseleni sheshýdi tapsyramyn», - dedi Astana ákimi.
Budan basqa, aralaý kezinde Áset Isekeshev № 29 kóshe men Kereı Jánibek handary, «Saranda» TK aýdanynda bolyp qaıtty. Máńgilik el dańǵylynan bastap Táýelsizdik dańǵylyna deıin № 29 kóshedegi jol-qurylys jumystarymen tanysyp shyqqan ákim, jaýaptylarǵa bastalǵan jumysty sońyna deıin jetkizýin jáne de aǵash otyrǵyzý men betki shym qyrtysyn tóseý jumystaryn da tapsyrdy.
«№ 29 kósheni Vena kvartaly men Esil aýdanyndaǵy turǵyn alaptaryna deıin jetkizý qajet. Bul óte mańyzdy-prıntsıpti túrde jasalatyn jumys, sebebi qala halqynyń sany jyldan jylǵa ósip keledi. Barlyq másele boıynsha sapaly jaǵdaı jasaýymyz qajet. Jaýaptylarǵa qysqa merzimi ishinde osy máseleni sheshýdi tapsyramyn», - dedi Á. Isekeshev.
Kólik jáne jol-kólik ınfraqurylymyn damytý basqarmasynyń málimetinshe, alty jolaqty jańa joldyń uzyndyǵy bir shaqyrym. Nátıjesinde Uly Dala men Máńgilik el dańǵylynda kólik azaıady.
Sonymen qatar, qarqyndy qurylys joǵaryda atalǵan aýdandarda ınjenerlik jeliler jáne kireberis joldar jańadan salynyp jatqan turǵyn úı keshenderinde de qamtamasyz etilmek.
