Isekeshev bızneske beriletin salalardy jarııalady
ASTANA. QazAqparat - Astana qalasynyń ákimi Áset Isekeshev memlekettik-jekeshelik seriktestik negizinde qolǵa alynatyn jobalardy keńeıtýdi kózdeıdi, dep xabarlaıdy QazAqparat tilshisi.
«Bıyl biz beınebaqylaý boıynsha jaqsy bir jobany iske asyrdyq. Atalǵan bastamanyń ekonomıkalyq tıimdiligi zor boldy. Aldaǵy ýaqytta memlekettik-jekeshelik seriktestik boıynsha taǵy úlken jobalarǵa konkýrs jarııalaıyn dep otyrmyz. Birinshiden, ol - ıntellektýaldy jaryq. Ony ınternetpen birge qostyq. Óıtkeni álem boıynsha ıntellektýaldy baǵanalardy ınternet úshin keńinen qoldanýda. Konkýrsqa qatysamyn deýshilerdiń arasynda otandyq jáne sheteldik kompanııalar bar» , - deıdi Áset Órentaıuly.
Ákimniń aıtýynsha, qazirgi kezde mektepter men emxanalardy basqarý júıesin ózgertip, bilim berý men densaýlyq salasynda da memlekettik-jekeshelik seriktestikti keńinen taratý máselesi pysyqtalyp jatyr. «Kelesi jyly bızneske taǵy úlken eki salany berýdi qarastyryp otyrmyz. Ol - qalany abattandyrý men tazalaý. Atalǵan salalarda jumys kóp. Ázirshe, ony kommýnaldyq qyzmetter atqaryp júr. Kelesi jylda atalǵan kásiporyndar jeke menshikke ótedi. Endigi kezekte tarıf máselesin rettep qoıǵan jón. Sebebi qalanyń tazalyǵy xalyqtyń kóńilinen shyǵýy tıis. Bizdińshe, 7-10 myqty kompanııa kelip, óz texnıkasymen qalany tazalaǵany durys. Kógaldandyrý da solaı. Mekteptegi tamaqtandyrý da solaı. Qoǵamdyq kólik salasynda da biz 5-7 jylǵa deıin kelisimsharqa otyrýǵa daıynbyz. Qazir birneshe avtopark bar. Biraq olar barlyq jaýapkershilikti óz moıyndaryna ala almaı jatyr», - dep atap kórsetti qala ákimi.
Aıta keteıik, búgin elorda ákimi Áset Isekeshev astanalyq kásipkerlermen kezdesti. Kezdesýge «Atameken» UKP prezıdıým tóraǵasy Tımýr Qulybaev ta qatysty.
