Isekeshev bazarlardaǵy jónsiz saýdany retke keltirýdi tapsyrdy
ASTANA. QazAqparat - Astana ákimi Áset Isekeshev Almaty aýdanyn aralap, birneshe áleýmettik jáne ınfraqurylym nysandardy kórdi, dep habarlaıdy QazAqparat ákimdiktiń saıtyna silteme jasap.
Qala ákimi Alash tasjolyndaǵy jónsiz ketken qalalyq bazarlardy jaýapty tulǵalar men onyń basshylaryna retke keltirýin tapsyrdy ári ol jerlerge jaıaý júrginshiler jol belgisi men avtoturaq ornyn salýdy mindettedi, ony qalaı oryndaǵany jóninde esepti kútetinin aıtty.
Eń birinshi ákim «Promyshlennyı» turǵyn alabyna at basyn burdy. Áset Isekeshev Jolaýshylar transporty jáne sáýlet, tabıǵı resýrstar basqarmasyna jáne de «Astana ÁKK» AQ-na gúlzardyń aınalmaly alańyn keńeıtý qurylysynyń josparyn jiktep-jiktep jasaýyn tapsyrdy. Sondaı-aq, jyly aıaldama, «1000 oryn» baǵdarlamasy boıynsha pavılon, gúlzar salý úshin Shalkóde kóshesiniń oń jaǵy men Sharbaqty kóshesiniń qıylysyndaǵy jer ýchaskelerin alýdy qarastyrý kerektigin aıtty.
Aýdan ákimine jergilikti turǵyndardan kelip túsken ótinishter boıynsha kópfýnktsıonaldy balalar alańy tanystyryldy. Ákim osy rette aýdandaǵy úılerdiń aldyn kórkeıtý kerektigin de eske sala ketti.
Ári qaraı aralaý Qobylandy batyr men Býrabaı kóshesiniń qıylysyndaǵy jol salynýy tıis jerde jalǵasyn tapty. Ákim bul jerdi de aıaqtaýdy jaýapty tulǵalarǵa tabystady. Budan keıin Kúıshi Dına men Abylaı han qıylysyna kelip, jol qurylysyn aıaqtaýda barlyq sharany qoldaný qajettigin pysyqtady. Ákim Pýshkın kóshesindegi «Sotsıým» turǵyn úı keshenindegi kósheni de jóndeý kerektigin qulaqqaǵys ete ketti. Osy oraıda, Almaty aýdany ákiminiń jol basqarmasy qurylysty júzege asyrý úshin jaqyn arada óziniń josparyn usynýy tıis.
«Barlyq tapsyrma Astana qalasynyń syrtqy kelbetin jaqsartýǵa, elordaǵa kelgen qonaqtar men turǵyndarynyń qaýipsizdigi men jaılylyǵy úshin jasalynyp jatyr», delingen habarlamada.
