Isekeshev aıazda adamdardy tegin jetkizgen kólik júrgizýshisinen úlgi alýǵa úndedi
Feısbýktaǵy toptardyń birinde qala turǵyny Ardaq Januzaqova tańerteń qatty aıazda aıaldamada turǵan jolaýshylardy sol jaǵalaýǵa tegin aparyp tastaǵan kólik júrgizýshisi týraly post qaldyrdy. «Búgin Eýrazııaǵa (saýda ortalyǵy - avt.) jaqyn jerdegi aıaldamada birneshe adam bolyp turǵanbyz. Bir kezde jol talǵamaıtyn kólikpen bir er adam toqtap: «Sol jaǵalaýǵa bara jatyrmyn, jol-jónekeı aparyp tastaımyn» dep aıqaılady. Basynda joldy surap tur ma, dep oıladyq. Alaıda ekinshi ret qaıtalaǵanda túsindik. Árıne, biz ol usynysty qýana-qýana qabyldadyq. Kólikke otyrǵannan keıin aqshany bergendi jón kórdim. Berip jatsam, kólik júrgizýshisi bas tartty. «Bul - meniń izgi nıetim. Odan da meshitke aparyp berińiz»,- deıdi.
P.S. Qystyń sońy da alys emes. Degenmen, qurmetti kólik júrgizýshileri, aıazda bos júre bermeı, jol-jónekeı bolsa, izgi isti jasaýdy umytpańyzdar. Tańerteń ondaı bastamalar jaqsy kóńil-kúı syılaıdy eken. Іzgi nıetińiz úsh eselep qaıtatyn bolsyn!
P.P.S. Mashınanyń markasy men nómiri esimde joq. Degenmen, «aqboz at» mingen kólik júrgizýshisi, saǵan myń da bir raqmet!», - dep jazdy Ardaq.
Osy jazbany kórgen Astana qalasynyń ákimi kólik júrgizýshisiniń jaqsy bastamaǵa uıytqy bolyp otyrǵanyn jetkizdi. «Eger árbir azamat kúnine bir izgi isti jasaıtyn bolsa (kómekke muqtaj otbasylarǵa qamqorlyq jasasa, aıazda bireýdi jetkizse, meıli, jaı jymıyp kúle salsa da), onda Astana meıirimdi adamdardyń mekenine aınalady», - dep atap kórsetti Áset Isekeshev.