Isekeshev Astananyń eńbek sińirgen qyzmetkerlerine páterler berdi
«Kele jatqan Qala kúni merekesimen quttyqtaımyn! Bul mereke qoǵamdyq-saıası mańyzy bar, elimizdiń árbir azamaty úshin jalpyqoǵamdyq mereke bolyp tabylady. Astana Qazaqstan egemendiginiń basty sımvoldarynyń biri, búkil álemge tanymal brend. Osy sátti paıdalana otyryp, Astana qalasynyń damýy men gúldenýine jaǵdaı jasap otyrǵandaryńyz úshin árqaısysyńyzǵa alǵysymdy bildirgim keledi. Biz bul qalany odan ári ádemi, yńǵaıly, taza etýde birigýimiz qajet», - dedi Áset Isekeshev.
Shahar basshysy ári qaraı qalanyń damý nátıjeleri jáne ınfraqurylymdyq jobalardy iske asyrý jaıynda esep berip, sheshimdi qajet etetin máselelerdi tilge tıek etti.
Máselen, 2017 jyldyń bes aıynda barlyq áleýmettik-ekonomıkalyq kórsetkishter boıynsha jaǵymdy ózgeris baıqalýda. Ónerkásiptik ónim kólemi 216,4 mlrd teńgege, ınvestıtsııa tartý 265,4 mlrd teńgege artty. 37% ósimmen 1,3 mln tekshe metr turǵyn úı paıdalanýǵa berildi. Tirkelgen orta jáne shaǵyn bıznes sýbektileriniń sany 142 myńǵa jetti, jumyssyzdyq deńgeıi 4,6 paıyzǵa tómendedi.
2017 jyldyń qańtar-mamyr aılary aralyǵynda memlekettik bıýdjetke túsken túsim kólemi 422,7 mlrd teńgeni qurady, onyń ishinde respýblıkalyq bıýdjetke 325,3 mlrd teńge, jergilikti bıýdjetke 97,4 mlrd teńge somasynda qarajat aýdaryldy. 
Degenmen, bilim ordalarynda oryn jetispeýshiligi, quqyqtyq tártip máseleleri, ınfraqurylymdy jaqsartý jáne úleskerlerdiń túıitkilderi syndy sheshimdi qajet etetin máseleler bar.
Keıin ákim qalalyq máslıhat depýtattarynyń sheshimimen «Astananyń qurmetti azamaty» ataǵyna laıyqtalǵan 4 adamǵa marapattaryn tapsyrdy.
Sondaı-aq áleýmettik, bilim, densaýlyq saqtaý salalarynyń qyzmetkerleri men ishki ister organdarynyń jáne de basqa sala qyzmetkerleri, barlyǵy 15 azamat páter kiltterin aldy.
