Isekeshev Astanany týrıster úshin tartymdy qalaǵa aınaldyrýda qoǵam pikirine qulaq túrmek
ASTANA. QazAqparat - Elorda ákimi Áset Isekeshev EKSPO-2017 kórmesine daıyndyq máselelerin talqylaý úshin Feısbýkte arnaıy paraqshanyń ashylǵandyǵyn jarııa etti, dep habarlaıdy QazAqparat.
«Dostar! Kúni keshe qaladaǵy qonaq úıler, meıramhanalar, dámhanalar, bankter, sýpermarketter, bazarlar, týrıstik kompanııalar men taksı qyzmetin kórsetetin mekemeler jáne taǵy basqa meımandardy qarsy alatyn sala ókilderimen kezdestim. Biz úshin bir bolyp jumys isteý óte mańyzdy. Óıtkeni ol arqyly Astanamyzdy týrıster úshin tartymdy qalaǵa aınaldyra alamyz. Osy turǵyda alda kele jatqan halyqaralyq EKSPO kórmesine tyńǵylyqty daıyndyǵymyzdy kórsetýimiz kerek. Keshe kóptegen máselelerdi birigip talqylap shyqtyq. Sol jerde keliskendeı búgin talqylaýymyzdy jalǵastyrý úshin Feısbýkte arnaıy paraqsha ashyp otyrmyz. Jıynǵa qatysqan barlyq qyzmet kórsetý mekemeleriniń ókilderi men basqa da saýal joldaımyn degen azamattar bolsa, osy paraqshaǵa jazýlaryńyzdy suraımyn. Usynystar bolsa qarastyramyz. Pikirlerińizdi eskeremiz. Qalalyq sheshimder bıýrosy men Astana konveshn bıýrosy ortaq jospar men birlesken áreketerimizdi árdaıym jiti qadaǵalaıtyn bolady. Belsendi bolatyndaryńyzǵa senemiz!», - dep jazdy elorda ákimi óziniń Feısbýktegi paraqshasynda.
