Isekeshev astanalyqtarǵa burqasynda úıden shyqpaýǵa keńes berdi
ASTANA. QazAqparat - Elorda ákimi Áset Isekeshev astanalyqtar men qala qonaqtaryna aýa raıynyń buzylýyna baılanysty úıden shyqpaýǵa keńes berdi. Shahar basshysy bul týraly óziniń Feısbýk paraqshasynda jazdy, dep habarlaıdy «QazAqparat» HAA tilshisi.
«Qurmetti astanalyqtar men qala qonaqtary! Aýa raıynyń qolaısyzdyǵyna baılanysty tótenshe jaǵdaılardyń aldyn-alý maqsatynda kóshede barynsha abaı bolýdy suraımyz. Asa qajettilik bolmasa, múmkindiginshe úıden shyqpaýǵa keńes beremiz. Burqasyn jel bolǵan jaǵdaıda dalada qalǵan bolsańyz, qaýipsizdik sharalaryn saqtaýlaryńyz qajet», - dep jazady Áset Isekeshev.
Qala ákimi óziniń jazbasynda qurylys alańdarynan aýlaq júrip, jarnama ilingen taqtalardan saqtanyp, elektr symdary men aǵashtardan aınalyp ótý kerektigin atap ótti.
«Tótenshe jaǵdaılar departamenti kez kelgen jaǵdaıda 112 nómirine habarlasýdy suraıdy. Dál qazir qaladaǵy barlyq kommýnaldyq qyzmetter kúsheıtilgen tártipte jumys isteýde», - delingen qala ákiminiń jazbasynda.
Eske sala ketsek, keshe Qazgıdrometke silteme jasaǵan qala ákiminiń saıtynda habarlanǵanyndaı, Astanada qar burqasyny 3 kúnge sozylady. 11 qańtarǵa arnalǵan boljam boıynsha kóshpeli bult júrip, qar jaýady, boran soǵyp, kóktaıǵaq bolady.
Sınoptıkterdiń boljaýyna qaraǵanda, 12 qańtar kúni burqasynnyń beti qaıta bastaıdy. Batystan, soltústik-batystan sekýndyna 9-14 metrlik jel soǵyp, túnde aýa temperatýrasy -11...-13 gradýsqa deıin tómendeıdi.
