Isekeshev astanalyqtardy mazalaıtyn úsh negizgi məseleniń sheshimin atady
Qala basshysynyń aıtýynsha, búginde aqparattyq texnologııalardyń arqasynda xalyqtyń ómirin barynsha jeńildetýge bolady. Ásirese, turǵyn úı kommýnaldyq sharýashylyǵy salasyna tsıfrlyq texnologııalardy engizýdiń nátıjesinde xalyqtyń biraz shyǵyndaryn qysqartýǵa múmkindik bar. Al, eń bastysy, qala turǵyndary aqshany ne úshin tólep jatqandaryn ashyq kóre alady.
«Búginde astanalyqtardy turǵyn úı kommýnaldyq sharýashylyǵy máselesi jıi mazalaıdy. Biz aryz-shaǵymdardy zerdeleý kezinde osyny túsindik. Halyq naqty úsh máseleni kóterip júr. Birinshiden, tarıfterdiń ashyqtyǵy bolýy qajet. Ekinshiden, qala turǵyndary aqshany ne úshin tólep jatqandaryn bilýi tıis. Úshinshiden, lıftiler, jalpy turǵyn úılerdiń jaǵdaıy baqylanýy shart. Dál osy máselelerdi biz memlekettik-jekeshelik seriktestik negizinde sheshýdi kózdeımiz. Bıyl qala turǵyndarynyń ómirin barynsha jeńildetýimiz kerek. Eýropa elderinde aqparattyq texnologııalar aqshany únemdeýge kómektesedi. Biz de qala turǵyndarynyń shyǵyndaryn ońtaılandyrýymyz qajet», - dedi Á.Isekeshev búgin Astana Innovation Challendge jobasy aıasyndaǵy kezdesýde. Atalǵan baıqaý xakaton úlgisinde úzdik texnlogııalyq jobalardy anyqtaýdy kózdeıdi.
Shara barysynda qala ákimi BI Group-tyń turǵyn úı kommýnaldyq sharýashylyǵyn basqarý tájirıbesi negizinde xalyqqa «aqyldy PIK-tiń» úlgisin kórsetýdi usyndy.
«Sosyn qala turǵyndaryna kórseteıik. Shyǵyndar qanshaǵa azaıady? Tólemderdiń ashyqtyǵy qalaı bolady? Sonyń bárin kórseteıik te, qala boıynsha engizeıik», - dep atap kórsetti Á.Isekeshev.
Aıta keteıik, Astana Innovation Challendge jobasy aıasyndaǵy kezdesýge QR Premer-Mınıstriniń orynbasary Asqar Jumaǵalıev te qatysyp, jas ınnovatorlarǵa óz keńesin berdi.