ISAS-2012 aıasynda birqatar elderdiń ǵalymdary Qazaqstanda dáris oqıdy
ASTANA. 28 mamyr. QazAqparat - 28 mamyr men 10 maýsym aralyǵynda Qazaq ulttyq agraralyq ýnıversıtetinde ISAS-2012 halyqaralyq jazǵy magıstrlik mektep uıymdastyrylady.
ISAS-2012 Halyqaralyq jazǵy magıstrlik mekteptiń maqsaty - Qazaqstandyq bilim men ǵylymdy Eýropa keńistiginde yqpaldasýǵa múmkindik beretin, Bolon protsesiniń basty prıntsıpi - akademııalyq mobıldilikti júzege asyrý», - delingen QR Bilim jáne ǵylym mınıstrliginiń málimetterinde.
Jazǵy mektep sheńberinde «Sý resýrstaryn yqpaldastyq basqarý», «Orman resýrstary men orman sharýashylyǵynyń zamanaýı basymdylyqtary», «Agrohımııa: azyq-túlik jáne ekologııalyq qaýipsizdik máseleleri», «Veterınarııa - bıoqaýipsizdik máselelerinde» bilim berý baǵdarlamalary boıynsha ózekti taqyryptar talqylanady.
Halyqaralyq jazǵy mektepte QazUAÝ-niń jetekshi ǵalymdary men Frantsııa, AQSh, Polsha, Chehııa, Reseı, Belarýs ýnıversıtetteriniń sheteldik ǵalymdary, sonymen qatar salalyq ǵylymı-zertteý ınstıtýttary men óndiris oryndarynyń ókilderi dárister oqıdy, sheberlik-trenıngter jáne óndiris jaǵdaıynda tájirıbelik sabaqtar ótkizedi. Magıstranttar dıssertatsııa jáne ǵylymı maqala daıyndaý jóninde ǵalymdardan keńes alady.
Sonymen qatar halyqaralyq jazǵy mektepte «Centre of Excellence» akademııalyq mobıldilik model ortalyǵynda dóńgelek ústel, «Time to study» lıngvıstıkalyq bilim berý ortalyǵynda magıstranttarmen ashyq sabaq ótkiziledi.
Halyqaralyq jazǵy magıstrlik mektep - bul magıstranttarǵa kásibı quzirettiligin joǵarylatýǵa, tájirıbelik biliktilik alýǵa, sondaı-aq sheteldik ǵalymdarmen baılanys ornatýǵa berilgen múmkindik.
