Іs qaǵazdaryn memlekettik tilde júrgizýdi qalalyq prokýratýra tekseredi - Astana
ASTANA. 20 aqpan. QazAqparat - Aldaǵy ýaqytta is qaǵazdaryn memlekettik tilde júrgizbeıtin astanalyq mekemelerdi tekserýge Tilderdi damytý basqarmasyna qalalyq prokýratýra organy kómektesedi.
Bul týraly Astana.kz saıtyna Tilderdi damytý basqarmasynyń bastyǵy Erbol Tileshov málim etti.
«Basqarma ótken jyly Qazaqstan Respýblıkasyndaǵy «Til týraly» Zań talaptarynyń saqtalýyn tekserý jóninde reıdter júrgizdi. Osy is-sharalar aıasynda memlekettik mekemelerdegi is qaǵazdarynyń júrgizilýin qarastyrdyq. Alaıda, saýda oryndaryna jáne basqa da respýblıkalyq nysandarǵa Basqarmanyń tekserý júrgizýge quqyǵy joq, olar tikeleı prokýratýraǵa baǵynady. Osyǵan baılanysty, 2012 jyly prokýratýramen birigip jumys isteý týraly birneshe ret ótinish bildirdik. Prokýratýra ótinishti qanaǵattandyrdy. Aqpan aıynan bastap Saryarqa aýdanynyń prokýratýrasymen birlesken tekserý jumystaryn bastap kettik. Almaty jáne Esil aýdandarynyń prokýratýralarymen birge taıaý kúnderde jumys odan ári jalǵasady. Eń basty bizdiń basa nazar aýdaratynymyz, aýdan ákiminiń apparatynda, sodan soń basqa mekemelerde is qaǵazdarynyń eki tilde júrgizilýi», - deıdi Erbol Tileshov.
Basqarma bastyǵynyń aıtýynsha, QR Mádenıet jáne aqparat mınıstrligi Til komıtetiniń, qala ákiminiń, Tilderdi damytý basqarmasynyń saıtyna azamattardan til zańnamasynyń buzylýy jóninde aryzdar kelip túsedi. Aldaǵy ýaqytta Basqarma osy túsken aryzdar boıynsha prokýratýra qyzmetkerlerimen birge tekserýler júrgizedi.
Taǵy bir aıta keter jaıt, Onomastıka týraly zańǵa ózgerister men tolyqtyrýlar engizildi. Onda Til týraly zańnyń buzylýyna baılanysty aıyppul salý máselesi qarastyrylǵan. Zańdy birinshi ret buzǵan mekemege 10 AEK, keleside 30 AEK mólsherinde aıyppul salynady. Odan ári 50 AEK mólsherinde jaýapkershilikke tartý qarastyrylǵan. Eń sońynda mekemeniń birinshi basshysyna ákimshilik jaza qoldanylady.
Bul qabyldanǵan sharalar Til komıtetiniń qolyna edáýir pármen berip otyr. Endigi jerde olar zań buzǵandarmen barynsha qatań túrde jumys júrgizetin bolady. Jańa qabyldanǵan zańǵa barlyq oblys, aýdandardaǵy til basqarmalary atsalysyp, barynsha qarqyndy jumys atqarylýda.
