IRSK: Iran AQSh-tyń soqqylaryna jaýap berýge daıyn
ASTANA. KAZINFORM – Tegeran Vashıngtonǵa áskerı teketirestiń odan ári órshýi múmkin ekenin eskertti, dep habarlaıdy Kazinform agenttiginiń menshikti tilshisi.
Iran Islam revolıýtsııasy saqshylary korpýsynyń ókili Hosseın Mohebbı dúısenbide AQSh jańa soqqy jasaǵan jaǵdaıda, Iran kúshteri qorǵanys tásilderin ózgertip, qarymta shabýyl jasaýǵa daıyn ekenin málimdedi.
Onyń sózin «Ál-Alam» telearnasy men Tasnim agenttigi taratty.
— Eger AQSh qaıtadan soqqy jasasa, qorǵanysymyz ben qarymta áreketimizdiń sıpaty edáýir ózgeredi. Soǵys qımyldarynyń aýmaǵy da keńeıýi múmkin, — dedi ol.
Onyń aıtýynsha, áskerı qımyldar qaıta jalǵassa, Iran qarýdyń jańa túrlerin qoldanyp, soqqy jasalatyn nysandar tizimin ózgertpek.
— Biz urys alańyna múmkindigi joǵary qarý-jaraqtyń jańa túrlerin qoldanamyz. Onyń áleýeti álem jurtshylyǵyn tańǵaldyrmaq. Buǵan qosa, osy ýaqytqa deıin shabýyl jasalmaǵan nysanalar da anyqtaldy, — dedi IRSK ókili.
Hosseın Mohebbı AQSh-tyń soǵysta tarıhı ári masqara jaǵdaıda jeńilgenin, alaıda Vashıngtonnyń muny moıyndaýǵa ázir emes ekenin málimdedi.
Ol buǵan dálel retinde Iran Ormýz buǵazyn japqannan keıin Vashıngtonnyń ondaǵy keme qatynasyn qaıta jandandyra almaǵanyn aıtty.
Iran Islam revolıýtsııasy saqshylar korpýsynyń ókili aımaqtaǵy amerıkalyq áskerı bazalar Iran soqqylarynan keıin qaýipsiz nysan rólin joǵaltqanyn aıtady.
Onyń aıtýynsha, zymyrandar Parsy shyǵanaǵy elderi men Iraktyń soltústigindegi AQSh barlaý ortalyqtaryna da tıgen.
Osy málimdemeler aıtylǵan tusta Iran Islam revolıýtsııasy saqshylar korpýsy dúısenbide Ormýz buǵazynyń áýe keńistiginde AQSh-ta jasalǵan «MQ-1» úlgisindegi dronnyń qaǵyp túsirilgenin málimdedi. Iran tarapy apparatty korpýstyń jańa áýe shabýylyna qarsy qorǵanys júıesi anyqtaǵanyn aıtady.
Buǵan deıin Iran AQSh-qa soǵysty toqtatý úshin shart qoıǵany habarlanǵan bolatyn.
Aqzat Baqytjanqyzy
