IRSK Erbılde AQSh-tyń barlaý aerostatyn joıǵanyn málimdedi
ASTANA. KAZINFORM – Irannyń Islam revolıýtsııasy saqshylar korpýsy (IRSK) Iraktyń Erbıl qalasynda AQSh armııasyna tıesili PSS-T úlgisindegi statsıonarlyq barlaý aerostatyn Shahed-136 soqqy berýshi drondarynyń kómegimen joıǵanyn málimdedi.
Irannyń Tasnim agenttigi osyǵan qatysty IRSK-tiń jazbasha málimdemesin jarııalady.
– Ótken aptanyń sársenbi kúni tańsáride Iraktyń soltústigindegi Erbıl áýejaıy aýmaǵynda ornalasqan AQSh armııasyna tıesili PSS-T úlgisindegi statsıonarlyq barlaý aerostaty IRSK Aeroǵarysh kúshteriniń Shahed-136 ushqyshsyz apparattarymen nysanaǵa alynyp, joıyldy, – delingen málimdemede.
IRSK málimetinshe, aerostat ótken aptada aımaqta Iran men AQSh arasyndaǵy qaqtyǵystar barysynda joıylǵan.
Málimdemede aerostattyń soǵylǵan sátin kórsetetin beınekadrlar da jarııalanǵan. IRSK-tiń aqparatyna súıensek, dástúrli áýe sharlarynan aıyrmashylyǵy, bul aerostat belgili bir núktege turaqty ornalastyrylyp, baqylaý munarasy retinde paıdalanylǵan.
IRSK aerostattyń uzyndyǵy shamamen 35 metr ekenin jáne salmaǵy 500 kelige deıingi ártúrli paıdaly júktemeni alyp júre alatynyn málimdedi. Onyń naqty qandaı bıiktikte ornalasqany resmı túrde jarııalanbaǵan. Alaıda keı derekkózder aerostattyń shamamen 750 metr bıiktikte bolǵanyn habarlaǵan.
IRSK málimetinshe, joıylǵan aerostat aınaladaǵy aýmaqty táýlik boıy baqylaýǵa múmkindik bergen jáne ádette bir aıǵa deıin áýede qala alǵan.
Aıta keteıik, keshe AQSh Irannyń munaı flotyna jańa soqqy jasaýy múmkin ekenin málimdegenin jazdyq.
