Irrıgatsııalyq júıelerdi kúrdeli jóndeý: Jambyl oblysynda úsh joba júzege asyrylyp jatyr
ASTANA. KAZINFORM – Jambyl oblysyna jumys sapary barysynda Sý resýrstary jáne ırrıgatsııa mınıstri Nurjan Nurjigitov Eýropalyq qaıta qurý jáne damý bankiniń qoldaýymen iske asyrylyp jatqan «Ótemis», «Senkibaı» jáne «Belqoja» sharýashylyqaralyq sý kanaldary júıelerindegi jumys barysymen tanysty.
Mınıstrlik málimetinshe, bul jobalar aımaqtyń sýarý kanaldary, drenajdyq júıeleri men gıdrotehnıkalyq nysandaryn rekonstrýktsııalaýdyń ekinshi kezeńi aıasynda júzege asyrylyp jatyr. «Ótemis» kanaly júıesinde jalpy uzyndyǵy 28 shaqyrym bolatyn ýchaskelerde beton tóseý, sondaı-aq gıdrotehnıkalyq nysandardy jóndeý jáne rekonstrýktsııalaý jumystary júrgizilip jatyr. Qurylys jumystaryna 47 adam jáne 17 arnaıy tehnıka jumyldyrylǵan. Búginge deıin 15,7 shaqyrym kanalǵa beton tóseldi.
Barlyq jumysty vegetatsııa kezeńi bastalǵanǵa deıin aıaqtaý josparlanyp otyr. Joba iske asqannan keıin osy júıe arqyly sýarylatyn jer kólemi 5131 gektarǵa jetedi. Qazir nysan 1626 gektar egistik alqapty sýmen qamtamasyz etip otyr.
«Senkibaı» kanalynda uzyndyǵy 14,2 shaqyrym bolatyn ýchaskede rekonstrýktsııalaý jumystary aıaqtaldy. Jalpy alǵanda, joba 21,8 shaqyrym kanaldy jańartýdy kózdeıdi. Bul jumystardy jyl sońyna deıin tolyq aıaqtaý josparlanyp otyr. Qazir nysanda 13 arnaıy tehnıka men 9 maman jumys istep jatyr. Jobany júzege asyrý nátıjesinde 4075 gektar egistik alqapqa sý jetkizý jaqsartylady. «Belqoja» júıesinde jalpy uzyndyǵy 19,215 shaqyrym bolatyn ýchaskelerde betondaý jumystary júrgizilip jatyr, onyń 15,8 shaqyrymy búginde aıaqtalǵan. Sonymen qatar gıdrotehnıkalyq nysandardy rekonstrýktsııalaý jumystary júrgizilip jatyr. Joba iske asqan soń, júıe arqyly sýarylatyn jer kólemi 2896 gektarǵa deıin ulǵaıady. Qazirgi tańda kanal 1860 gektar egistik alqapty sýmen qamtamasyz etedi.
Barlyq jumysty vegetatsııa kezeńi bastalǵanǵa deıin aıaqtaý kózdelgen. Nysandardyń jaǵdaıymen tanysqan Nurjan Nurjigitov kelesi jylǵy vegetatsııa kezeńiniń turaqty ótýi úshin jumystardyń sapaly ári ýaqytyly oryndalýyn qamtamasyz etýdi tapsyrdy.
– Bul jobalardyń maqsaty – sýarý kanaldary men ondaǵy nysandardyń tehnıkalyq jaı-kúıin qalpyna keltirip, sý únemdeý tehnologııalaryn engizý arqyly melıoratsııalyq jaǵdaıdy jaqsartý. Barlyq jumysty belgilengen merzimde oryndaý mańyzdy, óıtkeni bul aldaǵy vegetatsııa kezeńiniń turaqty ótýine áser etedi. Sondaı-aq merdiger uıymdardyń óz mindettemelerin sapaly oryndaýyna baqylaý ornatý qajet. Memleket basshysy Qazaqstan halqyna Joldaýynda sý sharýashylyǵy salasyn damytý úshin ırrıgatsııalyq júıelerdi jańǵyrtýdyń mańyzyn atap ótti. Osy baǵytta biz sheteldik seriktestermen tyǵyz jumys istep kelemiz. Mysaly, «Ótemis» kanalyn rekonstrýktsııalaý kezinde zamanaýı nemis tehnologııalary qoldanylyp, olardyń tıimdiligi tájirıbe júzinde dáleldendi, – dedi Sý resýrstary jáne ırrıgatsııa mınıstri.
Aıta keteıik, bıyl ırrıgatsııa júıelerindegi sý shyǵyny 250 mln tekshe metrge deıin azaıdy.