Irrıgatsııa jelilerindegi sý shyǵyny jylyna 193 mln tekshe metrge deıin azaıǵan

ASTANA. KAZINFORM — Irrıgatsııa jáne drenaj júıelerin jetildirý jobasynyń ekinshi kezeńi 74,5 myń gektar jerdi sýmen qamtý sapasyn jaqsartýǵa múmkindik berdi. Bul týraly vedomstvonyń baspasóz qyzmeti málim etti.

Irrıgatsııa jelilerindegi sý shyǵyny jylyna 193 mln tekshe metrge deıin azaıdy. Joba Almaty, Jambyl, Qyzylorda jáne Túrkistan oblystaryndaǵy 11 nysandy qamtıdy.

Mınıstrliktiń dereginshe, qazirgi ýaqytta Jambyl oblysynda 10 myń gektar egis alqabyn sýmen qamtamasyz etetin eki nysan paıdalanýǵa berildi. Qyzylorda oblysynda 15,1 myń gektar jerdi sýmen qamtamasyz etetin nysanda qurylys-montaj jumystary aıaqtaldy. Qazir ony paıdalanýǵa berý is-sharalary júrgizilip jatyr.

— 2025 jyldyń maýsym aıynyń basyna qaraı joba aıasynda 3064,88 shaqyrym kanal (88,3%), 1280,87 shaqyrym kollektor (80,4%), 26 593 gıdrotehnıkalyq qurylym (81,6%), 426 baqylaý uńǵymasy (92,4%), 222 tik drenaj uńǵymasy (100%) rekonstrýktsııalandy, — dep jazdy vedomstvodan. 

Irrıgatsııa jáne drenaj júıelerin jetildirý jobasynyń ekinshi kezeńin osy jyldyń sońyna deıin aıaqtaý josparlanyp otyr. Qazirgi ýaqytta 8 nysanda qurylys-montaj jumystary jalǵasyp jatyr.

— Jobany tolyq iske asyrý nátıjesinde sýarmaly sý shyǵynyn jylyna 360 mln tekshe metrge deıin qysqartýǵa, transshekaralyq sý kózderine táýeldilikti azaıtýǵa jáne kanaldardyń tıimdiligin 40–70%-ǵa deıin arttyrýǵa gıdromelıoratıvtik jaǵdaı jasalady. 105 myń gektar jerdiń sýmen qamtamasyz etilýi men jaǵdaıy jaqsarady, sondaı-aq jergilikti turǵyndar úshin 20 myńǵa deıin turaqty jumys orny ashylady,— dedi Sý resýrstary jáne ırrıgatsııa mınıstrligi Sý sharýashylyǵy komıteti tóraǵasynyń orynbasary Nurbek Serikov.

Aıta keteıik, sý salasy qyzmetkerleriniń jalaqysy 50%-ǵa deıin ósedi.