ІRO aıasynda «Qazposhtanyń» jumysyn kúsheıte túsý qajet

ASTANA. 5 sáýir. QazAqparat - ІRO aıasynda «Qazposhtanyń» jumysyn kúsheıte túsý qajet. Búgin Astanada «Halyqtyq ІRO»: nátıjeleri men keleshegi» baǵdarlamasynyń birinshi kezeńi» atty dóńgelek ústelde «Qaztransoıl» kompanııasy Bas dırektorynyń orynbasary Bolat Zákirov osylaı málim etti.

«ІRO-ǵa ázirlik úderisinde biz birqatar problemalarǵa tap boldyq. Onyń ishinde keıbir máseleler Qordyń, Úkimet pen Ulttyq banktiń qoldaýy arqasynda óz sheshimin tapty. Budan bólek, zańnamalyq ózgerister engizý qajettiligi týraly da aıtyldy. Al aldaǵy «KEGOC» AQ-n shyǵarýǵa qatysty qaıtalanýy múmkin kemshilikterge kelsek, bul baǵytta birqatar jumystardy júıeleý qajettigi týyndap otyr. ІRO-nyń basty úsh qadamy bar: brokerde shot ashý, oǵan aqsha aýdarý jáne ótinim berý. Biz aktsııaǵa jazylýǵa bir aı ýaqyt berdik. Alaıda, sońǵy kúnderi kelgen azamattar shot ashyp, qarajattaryn aýdarǵanymen, ótinim berýdi umytyp ketken. Nátıjesinde, olar aktsıoner bola almaı qaldy. Sondyqtan da, uıymdastyrýshylar da, brokerler de osyǵan nazar aýdarsa eken», - deıdi Bolat Zákirov.

Budan bólek, suranystyń artýy «Qazposhta» jumysyna da, óńirlerdegi brokerler men transfer-agentterge úlken aýyrtpalyq túsirgen. «Brokerlerdiń basym bóligi Almaty qalasynda ornalasqan. Biz kezdesip, Qazaqstan qarjygerler qaýymdastyǵymen olardan óńirlerge qaraı bet burýdy suradyq. Alaıda, ókinishke qaraı brokerlerdiń basym bóligi óz qyzmetterin aımaqtarda jandandyrýǵa qulyqty emes. Sondyqtan da, transfer-agent retinde «Qazposhtanyń» rólin nyǵaıtý kerek. Ony tehnıkalyq daıyndyqqa ázirlep, tehnologııalyq turǵydan da damytý qajet etiledi», - dedi ol.