Irlandııadan ákelingen 1000 bas iri qara Jambyl jerine jersinip keledi

TARAZ. QazAqparat – Jambyl oblysyndaǵy «Jambyl Et MS» JShS asyl tuqymdy mal basyn kóbeıtý úshin Irlandııanyń sıyrlaryn ákelip, jersindirý isin qolǵa alynǵan. Osydan tórt-bes aı buryn atalǵan memleketten oblysqa 1000 bas múıizdi iri qara jetkizilgen bolatyn, dep habarlaıdy QazAqparat tilshisi.

Atalǵan seriktestik dırektorynyń orynbasary Baqyt Iskalıevtiń aıtýynsha, ákelingen qunajyndar búginde Moıynqum óńirindegi «Beskepe» orman sharýashylyǵynyń qoryndaǵy qystaýda baǵylyp jatyr.

«Qunajyndardy ákelmes buryn Jalpaqtóbe aýylyndaǵy jáne Moıynqum óńirindegi mal jaıylymynan qora-jaıymyzdy daıyndap aldyq. Qunajyndar Irlandııa jerinde bir aı jáne osynda eki-úsh aı veterınarııalyq baqylaýda bolyp, karantınnen ótti. Bizdiń negizgi maqsatymyz – asyl tuqymdy mal sharýashylyǵyn damytý. Sonymen birge egin sharýashylyǵymen de aınalysý. Búginde ıeligimizde 14800 gektar jaıylymdyq jerimiz bolsa, onyń 5600 gektary «Beskepe» orman sharýashylyǵynyń qoryndaǵy jer teliminde ornalasqan»,- deıdi ol.

Olar múıizdi iri qarany 500 bastan bólip, eki qora-jaıǵa ornalastyrǵan.

«Shet memleketten kelgen mal bizdiń jerimizge jersinýde. Búginde bári de qońdy. Mal azyǵyna dep 666 tonna shóp, 110 tonna jem daıyndalǵan. Malshylardyń astynda minis attary bar. Olardyń ortasha eńbek jala¬qysy 120-150 myń teńgeni quraıdy. Seriktestikti qurǵanymyzǵa bir jyl tolǵanyna qaramastan biz bolashaqta et jáne sút baǵytyndada jumys isteýdi josparlap otyrmyz. Mal basyn olardyń tóli esebinen kóbeıtpekpiz», - deıdi seriktestik basshysy.

Seriktestikte biraz jumys mehanıkalandyrylǵan.

Sharýashylyqqa qajetti «MTZ-952» traktoryn, dezınfektsııalyq jumystarǵa arnaıy jabdyqtalǵan «ÝAZ» avtokóligin, eki dana «PTS-6» markaly júk tıegish pen qı shyǵaratyn tirkemelerdi satyp alypty.

Sharýashylyqta 20 adam turaqty jumyspen qamtylǵan.