Irlandııadaǵy qyz zorlaýǵa qatysty narazylyq jappaı tártipsizdikterge ulasty

ASTANA.KAZINFORM - Irlandııa astanasy Dýblın polıtsııasy pana izdeýshiler turatyn qonaqúı mańyndaǵy narazylyq zorlyq-zombylyqqa ulasqannan keıin tártipsizdik áreketterin aıyptady, dep habarlaıdy Kazinform agenttiginiń menshikti tilshisi.

Seısenbi kúni jas qyzǵa seksýaldy zorlyq-zombylyq jasady degen narazylyq aktsııalary kezinde bir top adam polıtsııa qyzmetkerlerine otshashý men basqa da zattar laqtyrǵan. Osydan keıin alty adam qamaýǵa alyndy.

Tártipsizdik qonaqúıdi panalaǵan er adamǵa jynystyq zorlyq-zombylyq jasady degen aıyp taǵylǵan kúnnen keıin bastalǵan.

Jergilikti BAQ onyń baspana izdep júrgen 26 ​​jastaǵy er adam, al jábirlenýshi Dýblınniń ońtústik-batysynda shabýylǵa ushyraǵan 10 jasar bala ekenin habarlady.

Dúısenbide mekeme syrtyndaǵy shaǵyn narazylyq beıbit túrde ótti, al seısenbi kúni keshke adamdar tas pen jol konýstaryn laqtyra bastady. Polıtsııa fýrgony órteldi.

Keıbireýler ırland týlaryn jelbiretip, mıgranttarǵa qarsy plakattar ustaǵan narazylyq bildirýshiler sany 2000-ǵa jetti.

Irlandııa polıtsııasy sherýshiler kirpish, shyny bótelkeler laqtyryp, polıtsııa qyzmetkerlerine shabýyl jasaǵan soń, alty adamdy qamaýǵa alǵanyn aıtty.

-Bul beıbit narazylyq bolmaǵany anyq. Búgingi keshtegi áreketterdi tek qana buzaqylyq dep sıpattaýǵa bolady. Bul polıtsııaǵa kúsh kórsetýdi kózdegen tobyr boldy,- dedi polıtsııa komıssary Djastın Kellı.

Buǵan deıin Italııadaǵy ereýilderge 2 mıllıonnan astam adam qatysqany habarlanǵan bolatyn.