Irlandııada Halyqaralyq volonterler jyly aıasynda «26 for «26» aktsııasy bastaldy
ASTANA. KAZINFORM - Qazaqstan Respýblıkasynyń Prezıdenti Qasym-Jomart Toqaevtyń bastamasymen BUU 2026 jyldy turaqty damý maqsatynda Halyqaralyq volonterler jyly (IVY 2026) dep jarııalady, dep habarlaıdy QR Mádenıet jáne aqparat mınıstrliginiń baspasóz qyzmeti.
Osyǵan oraı álemniń ár túkpirinde azamattardyń volonterlik qozǵalysqa belsendi qatysýyn arttyrýǵa jáne onyń qoǵamdaǵy mańyzyn kúsheıtýge baǵyttalǵan túrli ıgi bastamalar júzege asyrylyp keledi. Solardyń biri – Irlandııada ótip jatqan «26 for 26» ulttyq aktsııasy.
Bul bastama el turǵyndaryn jyl boıy 26 saǵat ýaqytyn volonterlik qyzmetke arnaýǵa shaqyrady.
- Aktsııa aıasynda halyqtyń osal toptaryna qoldaý kórsetý, bilim berý jobalaryn damytý, jergilikti qaýymdastyqtarǵa kómek kórsetý, ekologııalyq sharalar ótkizý jáne ırland tili men mádenıetin nasıhattaý baǵyttary qamtylǵan,-delingen habarlamada.
Aıta keteıik, Memleket basshysy Qasym-Jomart Toqaev elimizde ótken volonterler forýmynda bıyl búkil álem Halyqaralyq eriktiler jylyn atap ótip jatqanyn jetkizdi.
- Ózderińiz bilesizder, bul bastamany men Birikken Ulttar Uıymynyń 75-shi sessııasynda kóterdim. Elimizdiń usynysy jahandyq aýqymda qoldaý tapty. Biz órkenıetti el retinde kúlli adamzatqa ortaq qundylyqtardy dáripteımiz, ony keleshek urpaqqa amanat etemiz,-degen bolatyn.
