Irlandııa Úkimeti Eýroodaqtyń qarjylaı kómeginen bas tartý týraly sheshim qabyldady
ASTANA. 14 qazan. QazAqparat - Irlandııa Eýroodaq pen halyqaralyq valıýta qorynyń qarjylaı kómeginen bas tartady. Bul týraly taıaýda eldiń premer-mınıstri Enda Kennı málim etti, dep habarlady Rosbalt.
Onyń atap ótýinshe, Irlandııa 15 jeltoqsan kúni EO men HVQ-nyń daǵdarysqa qarsy baǵdarlamasynan shyǵatyn bolady. Úkimet basshysynyń sózine qaraǵanda, bul el barlyq qarjylyq problemalardan aryldy degendi bildirmeıdi. «Bizdi áli de talaı qıyndyqtar kútip tur, áli de kóptegen is tyndyrýǵa týra keledi. Biraq tótenshe qarjylaı kómek dáýiri aıaqtalady», - dedi E.Kennı.
Aıta keteıik, 2010 jyly Irlandııa EO men HVQ-tan 85 mlrd. eýro somasynda qarjylaı kómek alǵan bolatyn.
2013 jyldyń 2 toqsanynda E.Kennı Irlandııadaǵy quldyraý toqtaǵandyǵyn málimdep, ekonomıkasynyń ósimi 0,4 paıyzǵa jetkenin atap ótti. Alaıda, el bıligi salyqtardy arttyrý ári bıýdjet qarajatyn únemdeý baǵytyn saqtap otyr. Bul sharalar 2014 jyly memleket bıýdjetine shamamen 2,5 mlrd. eýro kiris ákelýi tıis.
