Irlandııa shirkeý mektepterindegi bala zorlaý faktilerin tekserý úshin arnaıy komıssııa qurady

ASTANA. KAZINFORM — Irlandııa Úkimeti mektepterdegi jynystyq zorlyq-zombylyqty tergeý jónindegi komıssııa qurady, dep jazady Euronews.

Maýsym aıynda jarııalanǵan aldyn ala tergeý nátıjesi 1927-2013 jyldar aralyǵynda eldiń barlyq bólikterindegi 308 mektepte kem degende 2400 qylmys jasady degen kúdikke ilingen 884 zorlaýshy jumys istegenin kórsetti. Qazir kúdiktilerdiń jartysynan kóbi ómirden ótip ketken. 

Eldiń bilim mınıstri Norma Foýlı bul baıandamany «jynystyq zorlyq-zombylyqtyń eń qorqynyshty dálelderi kórsetilgen jantúrshigerlik qujat» dep atady.

Ol zorlyq-zombylyqtan aman qalǵan jáne bul týraly tergeýshiler men buqaralyq aqparat quraldaryna aıtyp bergen burynǵy stýdentterdiń «erekshe batyldyǵyn» atap ótti: mundaı 149 adam tabyldy. Kópshiligi - qazir 50-60 jasqa kelgen er adamdar.

Aldyn ala tergeý qorytyndysy boıynsha berilgen negizgi usynystyń biri — úkimettik komıssııa qurý. Qujat kólemi 700 betten asady.