Irlandııa, Meksıka, Sıngapýr: Qazaqstan qaı elderge ІT-qyzmet eksporttap otyr
ASTANA. KAZINFORM – Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev Senattyń jalpy otyrysynda otandyq ІT-kompanııalardyń eksporttaǵy jetistigine toqtaldy.
«Qazaqstannyń IT-qyzmetter eksporty qarqyndy ósip keledi. 2023 jyly eksport kólemi 529 mıllıon dollarǵa jetse, 2024 jyldyń birinshi jartyjyldyǵynda 306 mıllıon dollar boldy. Biz halyqaralyq naryqtaǵy úlesimizdi arttyra otyryp, 2026 jylǵa qaraı 1 mıllıard dollar deńgeıine jetýge senimdi qadam jasap jatyrmyz. Búgingi tańda Qazaqstannyń IT-qyzmetteri 86 elge eksporttalady», - dedi ol.
Jaslan Mádıevtiń paıymynsha, bul eldiń tsıfrlyq sheshimderge degen joǵary suranys bar ekenin kórsetedi.
Mınıstrlik usynǵan qosymsha málimetke súıensek, bul saladaǵy eksporttyń negizgi baǵyttary Reseı (34,5 mln dollar), Irlandııa (30,3 mln dollar), Meksıka (26,6 mln dollar), AQSh (12,6 mln dollar) jáne Sıngapýr (12,3 mln dollar).
Byltyr jetekshi eksporttaýshylardyń kóshin Netcracker, PAM, MX Credit Systems, Ozon, MyTona jáne Playrix kompanııalary bastaǵan.
Osyǵan deıin elimizde taǵy úsh jer serigi qurastyrylatyny týraly jazdyq.
