Irkýtskide orman órti bir táýlikte 31 myń gektarǵa ulǵaıdy
IRKÝTSK. TASS-QazAqparat – Reseı Federatsııasynyń Irkýtsk oblysynda órt sharpyǵan orman aýmaǵy bir táýlikte 31 myń gektarǵa ulǵaıdy, dep habarlaıdy «QazAqparat» HAA TASS agenttigine silteme jasap.
Óńirlik úkimettiń baspasóz qyzmeti taratqan málimetterge qaraǵanda, qazir otqa oranǵan orman aýmaǵy 700 myń gektarǵa jetip otyr. Senbi kúngi tańerteńgi ýaqyttaǵy málimet boıynsha, Sibir ormanynyń 670,3 myń gektary órt qushaǵynda qalǵan.
«11 tamyzdyń tańynda jalpy aýmaǵy 16 myń 251 gektar bolatyn 21 órt sóndirildi. Jalpy 102 myń 701 gektar aýmaqtaǵy 62 órtti aýyzdyqtaı almaı otyrmyz. Budan bólek, baqylaý aımaǵynda 579 myń 955 gektar aýmaqtaǵy 59 orman janyp jatyr», - delingen habarlamada.
Osylaısha, tilsiz jaý 701,4 myń gektar ormandy jalmaǵan.
Irkýtsk oblysynyń gýbernatory Sergeı Levchenkonyń málimdeýinshe, órtti sóndirýge 1,5 myńǵa jýyq adam jumyldyryldy.
«Ormandy jalǵa alýshylardyń kúshteri de tartyldy. Bizge ótken aptada Qorǵanys jáne Tótenshe jaǵdaılar mınıstrlikteri de kómektesti. Basty mindet oryndalýda, ıaǵnı órttiń eldi mekenderge taralýyna jol bermeı otyrmyz. Apta boıy Il-76 ushaǵy jumys istedi, ol bir ushqanda 42 tonna sý shashady», - dedi Levchenko.
Derekterge qaraǵanda, 74 eldi meken tútinge tunshyǵyp otyr. Kırensk qalasynda aýadaǵy zııandy zattar mólsheri, atap aıtqanda, kúkirt dıoksıdi 1,04 ese, kómirtegi oksıdi 1,2 ese, azot dıoksıdi 1,1 ese artqan.
Levchenkonyń aıtýynsha, jaýyn jaýmaǵandyqtan, óńirdiń soltústiginde bir aı boıy órt báseńdemeı otyr. Irkýstk oblysynyń gıdrometeorologııa jáne qorshaǵan ortany monıtorıngileý basqarmasynyń málimetine qaraǵanda, dúısenbi kúni jańbyr jaýýy tıis.
