Irkýtskide «Boıaryshnıkten» kóz jumǵandar sany 48 adamǵa jetti
ASTANA. QazAqparat - Reseıdiń Irkýtsk qalasynda sýrrogatty alkogoldi ishimdikten ýlanyp, kóz jumǵandar sany 48 adamǵa jetti. «Interfaks» agenttiginiń jazýynsha, bul týraly qaladaǵy Lenın aýdanynyń prokýrory Stanıslav Zýbovskıı aıtqan, dep habarlaıdy QazAqparat.
Onyń aıtýynsha, búgingi kúni ýly suıyqtyqty qoldanǵan 57 adam anyqtaldy, olardyń 48-i - ajal qushty.
Sýrogatty alkogolmen jappaı ýlaný oqıǵasy Irkýtskiniń Novo-Lenıno shaǵynaýdanynda 17-18 jeltoqsan kúnderi boldy. Zardap shekken - 35-50 jas aralyǵyndaǵy áıelder men er adamdar «Boıaryshnık» vannaǵa arnalǵan kontsentrat» parfıýmerli kosmetıkalyq suıyqtyǵyn qoldanǵan.
Jergilikti medıtsına qyzmetkerleriniń málimetinshe, ýlaný suıyqtyqtyń quramynda bolǵan metıl spırtinen nemese metanoldan, sondaı-aq antıfrızden bolǵan.
Irkýtskide tótenshe jaǵdaı rejimi engizildi. Qalanyń saýda núktelerinde tamaqqa qoldanylmaıtyn quramynda spırti bar suıyqtyqtardy satýǵa tyıym salyndy.
Atalǵan fakti boıynsha qylmystyq is tergelýde. Jeti adam, sonyń ishinde eki kásipker ustaldy. TASS agenttigi qalalyq ishki ister basqarmasy bastyǵynyń orynbasary German Bratchıkovtyń málimdemesine silteme jasap jazýynsha, Irkýtskiniń baq sharýashylyqtarynyń birinde «Boıaryshnık» pen ózge kontrafaktilik ónimder jasalyp kelgen astyrtyn tseh anyqtaldy.
Tótenshe jaǵdaı jóninde Reseı Prezıdenti Vladımır Pýtın de qulaǵdar etildi. «Árıne, bul qaıǵyly oqıǵa týraly (baıandaldy), bul aýyr jaǵdaı. Árıne, problemalardyń bul toby jaqsy tanys jáne ol týraly prezıdentke baıandaldy. Jáne bul, jiti nazar aýdarýdy jáne shara qabyldaýdy qajet etedi», - dep keltirdi RF basshysynyń baspasóz hatshysy Dmıtrıı Peskovtyń sózin Reseı jańalyqtary agenttigi.
