Irkýtskide oba qaýpi rastaldy ma: Reseı bıligi men DDU ne deıdi
MÁSKEÝ.KAZINFORM — Irkýtsk oblysynda obaǵa qarsy ǵylymı-zertteý ınstıtýtynyń qyzmetkeri qaıtys bolǵannan keıin epıdemıologııalyq tekserý bastaldy. Oqıǵa Dúnıejúzilik densaýlyq saqtaý uıymy (DDU), Aýrýlardyń aldyn alý jáne baqylaý jónindegi eýropalyq ortalyq (ECDC) jáne birqatar elderdiń sanıtarııalyq organdarynyń nazaryn aýdardy. Buǵan marqumnyń ókpe obasynan qaıtys bolýy múmkin degen aqparattyń taralýy sebep boldy. Alaıda Reseı bıligi bul dıagnozdy ázirge rastaǵan joq. Irkýtskidegi jaǵdaıǵa qatysty qazirgi tańda ne belgili?
Irkýtsk oblysynda ne boldy?
2 qazanda Irkýtsk obaǵa qarsy ınstıtýtynyń qyzmetkeri Shelehov aýdandyq aýrýhanasynda qaıtys bolǵany belgili boldy. BAQ-ta onyń ókpe obasynan qaıtys bolýy múmkin degen rastalmaǵan aqparat taraǵannan keıin bul jaǵdaı alańdaýshylyq týǵyzdy. Keńeıtilgen zerthanalyq zertteýlerdiń nátıjesinde qaıtys bolǵan adamnyń materıaldarynan onyń kásibı qyzmetine baılanysty mıkroorganızmder anyqtalǵan joq. Obaǵa qarsy ınstıtýt qyzmetkerine etıologııasy anyqtalmaǵan pnevmonııa dıagnozy qoıylǵan.
Jaǵdaıǵa degen joǵary nazar Telegram-arnalarda obaǵa qarsy ınstıtýt qyzmetkeriniń ólimine ókpe obasy sebep bolýy múmkin degen rastalmaǵan aqparattyń taralýynan keıin kúsheıdi. Keıin Reseıdiń sanıtarııalyq organdary bul aqparatty rastaǵan joq.
3 qazanda DDU Halyqaralyq medıtsınalyq-sanıtarııalyq erejelerge sáıkes Reseı tarapynan qosymsha aqparat surady.
4 qazanda Rospotrebnadzor Irkýtsk oblysy, Irkýtsk qalasy jáne Shelehovtaǵy sanıtarııalyq-epıdemıologııalyq jaǵdaı turaqty ekenin habarlady. Sonymen qatar bıologııalyq qaýipsizdik talaptarynyń saqtalýyn baqylaý jónindegi komıssııa Irkýtsk obaǵa qarsy ınstıtýtyn tekserdi. Patogendi mıkroorganızmdermen jumys isteý kezinde qandaı da bir apatty jaǵdaı anyqtalǵan joq. Komıssııa qorytyndylaryn Rospotrebnadzor basshysy Anna Popovanyń tapsyrmasymen ınstıtýtqa jiberilgen sarapshylar da rastady.
DDU jaǵdaı týraly
DDU osy jaǵdaıǵa qatysty óz ustanymyn jarııalap, «sanıtarııalyq-epıdemıologııalyq sıpattaǵy qaýipterdiń joqtyǵyn» málimdedi.
— DDU Halyqaralyq medıtsınalyq-sanıtarııalyq erejelerge sáıkes Reseıden osy jaǵdaıǵa qatysty qosymsha aqparat surady. Reseıdiń densaýlyq saqtaý organdarynyń málimetinshe, sońǵy ýaqytta Irkýtsk oblysynda oba aýrýy tirkelmegen. Sondaı-aq óńirde epıdemıologııalyq tekserý júrgizilip, aldyn alý jáne epıdemııaǵa qarsy sharalar qabyldanǵan. Naýqaspen baılanysta bolǵan adamdar anyqtalyp, olar medıtsınalyq baqylaýǵa alynyp, qajetti testileýden ótken, — dedi DDU basshysy Tedros Adhanom Gebreıesýs.
Since the first media reports, @WHO has been actively following up on the reported death of a laboratory worker at the Irkutsk Antiplague Research Institute in Irkutsk oblast, Russian Federation. The individual died on 2 October 2026 after being hospitalised with severe pneumonia. Initial media reports suggested pneumonic plague following an alleged accidental laboratory exposure. In response to WHO’s verification request under the International Health Regulations, the Russian health authorities reported that no case of plague had recently been registered in Irkutsk oblast. They informed WHO that an epidemiological investigation had been conducted, preventive and control measures implemented, and identified contacts placed under medical observation and tested. They reported that no high-threat pathogens had been detected among the contacts and that medical observation of all identified contacts had been completed. WHO has remained in contact with the Russian health authorities and has offered technical support. WHO has requested further information to clarify the cause of the severe pneumonia, the pathogen that prompted the public health measures, and media reports of a second employee with pneumonia of undetermined cause. Timely, complete and transparent information sharing under the International Health Regulations is essential to clarify conflicting reports and enable an accurate assessment of potential public health risks.
— Tedros Adhanom Ghebreyesus (@DrTedros) October 6, 2026
DDU sondaı-aq Reseı bıliginiń málimetinshe, baılanysta bolǵan adamdardyń arasynan joǵary qaýip tóndiretin ınfektsııalardyń qozdyrǵyshtary anyqtalmaǵanyn atap ótti. Anyqtalǵan barlyq baılanysta bolǵan adamdardy medıtsınalyq baqylaý aıaqtaldy.
— DDU Reseıdiń densaýlyq saqtaý organdarymen baılanysyn jalǵastyryp, tehnıkalyq kómek kórsetýdi usyndy. Uıym aýyr pnevmonııanyń sebebin, qoǵamdyq densaýlyq saqtaý sharalary qabyldanýyna sebep bolǵan qozdyrǵyshty, sondaı-aq etıologııasy anyqtalmaǵan pnevmonııamen aýyrǵan ekinshi qyzmetker týraly BAQ habarlamalaryn naqtylaý úshin qosymsha aqparat surady, — dep qosty Tedros Adhanom Gebreıesýs.
Óńirde qandaı sharalar qabyldandy?
Irkýtsk oblysynda epıdemııaǵa qarsy is-sharalar uıymdastyrylyp, naýqaspen baılanysta bolǵan adamdar anyqtaldy.
Marqum emdelgen Shelehov aýdandyq aýrýhanasynda sanıtarııalyq-epıdemııaǵa qarsy is-sharalar júrgizildi. Statsıonarda patsıentterdi qabyldaý men aýrýhanadan shyǵarýǵa ýaqytsha shekteýler engizildi, al emhana jumysyn jalǵastyrdy.
Irkýtsk oblysynyń gýbernatory Igor Kobzev baılanysta bolǵan adamdardyń medıtsınalyq baqylaýda bolǵanyn habarlady. Rospotrebnadzor basshysy Anna Popova óńirge jeke ózi kelip, qajetti sharalardy uıymdastyrý jumystaryna qatysty.
Anyqtalǵan barlyq baılanysta bolǵan adamdar medıtsınalyq baqylaýǵa alyndy.
Baılanysta bolǵan adamdardyń bir bóliginen basqa respıratorlyq ınfektsııalar anyqtaldy — COVID-19-dyń eki jaǵdaıy jáne rınovırýstyq ınfektsııanyń eki jaǵdaıy. Asa qaýipti ınfektsııalardyń qozdyrǵyshtary anyqtalǵan joq.
Halyqaralyq reaktsııa
6 qazanda Aýrýlardyń aldyn alý jáne baqylaý jónindegi eýropalyq ortalyq (ECDC) zerthana qyzmetkeriniń shyǵý tegi anyqtalmaǵan pnevmonııadan qaıtys bolýynan keıingi jaǵdaıdy muqııat baqylap otyrǵanyn habarlady. Qazirgi ýaqytta aýrýdyń ekinshi jaǵdaıy tirkelmegen jáne ınfektsııanyń adamnan adamǵa turaqty berilýi arqyly odan ári taralýyna ákelýi múmkin ekenine eshqandaı dálel joq.
Irkýtsk oblysyndaǵy jaǵdaı AQSh bıliginiń de nazaryn aýdardy.
6 qazanda AQSh Memlekettik hatshysy Marko Rýbıo Reseı tarapyn halyqaralyq qaýymdastyqqa aýrý týraly qosymsha aqparat berýge shaqyrdy. Ol Vashıngton jaǵdaıdyń damýyn baqylap otyrǵanyn jáne tergeý nátıjelerine qatysty Máskeýden barynsha ashyqtyq kútetinin atap ótti. Sol kúni AQSh prezıdenti Donald Tramp Vladımır Pýtınmen telefon arqyly sóılesýdi josparlap otyrǵanyn habarlady. Onyń barysynda Reseıdegi ókpe obasynyń yqtımal jaǵdaıyn talqylamaq bolǵan.
Óz kezeginde Kreml Donald Tramptyń Irkýtsk oblysynda etıologııasy anyqtalmaǵan pnevmonııa anyqtalýyna baılanysty Reseıge kómek kórsetý týraly usynysyn oń baǵalady.
— Ózara kómek usynylǵan kezde bul qashan da jaǵymdy, — dedi Reseı prezıdentiniń baspasóz hatshysy Dmıtrıı Peskov.
Ol sondaı-aq Rospotrebnadzordyń resmı aqparatyna súıenýge shaqyrdy.
— Bul saladaǵy quzyretti negizgi vedomstvo — Rospotrebnadzor. Sondyqtan túrli qaýesetter men ártúrli pikirlerge qulaq aspaı, dál Rospotrebnadzordyń resmı málimdemelerine súıený kerek. Rospotrebnadzorda osy salada joǵary bilikti mamandar jumys isteıdi, olardyń resmı málimdemelerine qulaq asaıyq, — dedi Peskov.
Qytaı da sanıtarııalyq-epıdemıologııalyq yntymaqtastyq aıasynda jaǵdaıdy baqylap otyrǵanyn habarlady. Buǵan deıin Beıjiń Reseı tarapymen ınfektsııalyq aýrýlardyń, onyń ishinde asa qaýipti ınfektsııalardyń aldyn alý jáne baqylaý salasynda yntymaqtastyq ornatqanyn málimdegen.
Qyrǵyzstanda memlekettik shekara arqyly ótkizý pýnktterinde profılaktıkalyq sharalar men sanıtarııalyq-karantındik baqylaý kúsheıtildi.
Qazaqstan Densaýlyq saqtaý mınıstrligi de Reseıdiń Irkýtsk oblysyndaǵy jaǵdaıdy baqylap otyr.
